呢幾日寒流襲港，今晚（20日）谷中跑夜馬，只得攝氏12、13度，但兩騎師史卓豐同郭能，喺本月17日停賽期間，率先證明自己越凍越醒神，兩人分途「出擊」，首次參加半馬拉松同陸上兩項鐵人賽。

23歲的史卓豐一直對長跑都好有興趣，但香港絕大部份長跑賽事，都撞正賽馬日舉行，豐豐身為騎師，當然要留番啲氣力搏殺，對長跑比賽只能夠望門輕嘆，咁啱剛周日停賽，於是踏出第一次，參加屯門半馬拉松賽。

呢場半馬清晨5點開跑，豐豐當日凌晨3點幾就入到屯門，遇正氣溫驟降，就算室內都覺得難頂，更何況豐豐當日只穿短袖衫褲，一啲都唔好受。不過，豐豐克服種種不利因素，首次跑半馬只用1小時25分就完成，喺近3000名參賽者中總成績殺入前30名，以長跑新手嚟講，呢個時間真係幾誇張。

豐豐話平時為減磅都有練跑，但最長只跑8公里，多得女友Hannah一早陪佢起身，仲入專登入屯門同佢打氣，跑得特別興奮，平時自己揸車都會經過屯門公路，但今次能夠喺呢條平日非常繁忙嘅公路上奔跑，份外難忘。

郭能亦唔係浪得虛名，近日出戰中環龍和道嘅陸上兩項鐵人錦標賽，所謂陸上兩鐵即係跑步同踩單車，途程分別係8.5同20公里，39歲嘅Ironman只用1小時11分33秒就完成，喺男子35至39歲組別獲得第6名。郭能太太Trish同三個仔係本地三鐵賽事嘅常客，郭能話遇正停賽，索性自己都首次落場感受一下。