梁朝偉和湯唯在《色，戒》中的逼真床戲，惹來打真軍疑雲，不過錢嘉樂遭愛國學生夾手夾腳刺殺，負傷碌落樓梯一幕，他卻沒花沒假打真軍上陣，身手敏捷的他應導演李安要求，僅用一個鏡頭便做到俯伏滑下狹窄的樓梯，結果三take完成，較諸其他演員拍一場文戲對白便吃下數十NG的紀錄，嘉樂不禁暗自偷笑。　撰文：比華利

電影《色，戒》的熱潮未止，截至前日該片香港票房已累積達3,006萬，當大家不斷談論片中飾演易先生的梁朝偉和飾演王佳芝的湯唯多場大膽性愛演出，其實扮演易先生跑腿的曹副官錢嘉樂也是關鍵人物，沒有他的安排王佳芝便不能混入易太太的麻雀局，也不能輕易搭上易先生。

處男試鏡心情緊張

曹副官勾結漢奸，行為可恥，當王力宏為首的一班愛國學生發現佈局殺害易先生的計劃失敗，又被曹副官揭發身份，一觸即發的衝動，決意殺人滅口，曹副官在多名學生圍攻下死於梯間。
相約嘉樂到戲中被殺死的港島區西半山寶珊道古老大宅拍照，他乘機重遊遇害現場，又在戲中伏屍的樓梯接受訪問，回憶拍攝《色》片時的點滴，他說：「記得一年多前喺呢度拍戲，好熱鬧，舊年嘅中秋，李安導演仲帶月餅嚟畀大家食，真係好難忘。」
貴為國際大導，李安一向選角嚴謹，不少具知名度的演員甚至會向他自薦，可是他偏偏為《色》片挑選曹副官一角時，看上特技人出身的嘉樂，並主動聯絡他的經理人安排試鏡，令嘉樂受寵若驚。嘉樂說：「搵我拍戲都好少要試鏡，所以李安約試鏡係我從演26年嚟嘅第一次，嗰日真係有啲緊張。」當日彼此寒暄過，李安要求嘉樂試戲，嘉樂卻拒絕：「我大膽要求佢畀兩個禮拜時間我練吓啲國語先，佢都好體諒。」於是嘉樂立即找了鄭佩佩當老師惡補，兩周後再試鏡，嘉樂的普通話雖仍然不靈光，但李安還是選中他，讓他邊拍邊學。

獲贈兩書投入角色

李安為了令演員演出更細膩，他為不同的演員送上貼身的錦囊，嘉樂也不例外，獲得《我的特務生涯》和《戴笠野史》兩本天書，嘉樂說：「李安仲喺本書貼咗memo，佢驚我冇時間睇晒，所以做咗記號只係睇嗰幾頁，佢真係好細心。」
嘉樂在《色》片給王力宏等一班愛國青年合力刺殺，他雖被刀刺中腹部，身上流血不止，但仍繼續掙扎，就算碌落樓梯仍奄奄一息，最終給王力宏扭斷頸項致死。巧合地，95年嘉樂在電影《烈火戰車》中撞車後，他還嚷着要喝水，直至噴血而死，他好像擅於演繹這類生命力頑強的角色，嘉樂卻說：「其實導演安排呢幕好細緻，因為嗰班青年嘅行動係出於愛國，佢哋根本冇殺人嘅經驗，所以就算夾手夾腳插我幾刀，又唔係職業殺手，點會一捅我就即死，我先死極都死唔去。」
嘉樂表示李安就是看中他有敏捷身手，可以勝任這場碌落樓梯戲，不過，拍攝前，嘉樂都非常緊張，他不諱言：「李安都有話自己唔熟悉動作戲份，所以同學生打交戲，我都兼埋做少少動作指導。我知道李安對每個鏡頭都要求嚴謹，演員們都樂於不斷重拍配合，不過，我拍碌落樓梯呢幕前，我諗如果佢係咁NG就唔掂噃。我拍之前就同佢商量，話自己𠵱家年紀同狀態唔係最弗，take得太多驚身體頂唔順，佢都好體諒。」嘉樂這番話只是謙虛，其實他充滿信心可以掌握得恰到好處，結果只要三take，李安就滿意收貨。

渴望撇開搞笑形象

其實嘉樂這場被殺戲，竟是不少香港觀眾笑位之一，這與他深入民心的搞笑形象有密切關係，他也無奈說：「演員有時就係俾自己形象局限咗，唔可以用另一個身份去演其他嘢，我好希望有一日香港人可以除低呢副眼鏡，不過，《色》片又唔單止淨係畀香港人睇嘅。」
這次與李安的合作，令嘉樂獲益良多，他讚不絕口：「佢係一位好文藝同有修養嘅人，呢次合作裏面，佢啓發咗我好多嘢，以前我演戲絕大部份係打天才波。我拍咗咁多年戲，有時都覺得乏味，可能做得耐，樣樣嘢以為喺自己計算之內，某段時間少咗衝擊，𠵱家會反省吓係咪仲未夠。」嘉樂期待不久將來，二人會再度合作，他搞笑說：「下次我要佢畀我演易先生，或者等我好似偉仔咁弗先。」

後記：NG只為更好

有份參演《色，戒》的演員，無論大牌如梁朝偉，甚至戲中一個小腳色，李安導演都對他們要求嚴格，為了達到完美的效果，演員們也不介意NG再NG。這次與錢嘉樂重遊舊地拍照做專訪，攝影師也嚴謹要求嘉樂在指定位置擺甫士，有時更重複又重複地要求他做出相同表情和動作，嘉樂即大幽攝影師一默：「你同李安一樣。」很有演員道德的嘉樂最終也非常合作，吃了幾個NG便順利完成拍攝工作。

場景小八卦：寶珊道破屋充豪宅

在《色，戒》中一班愛國學生為接近梁朝偉飾演的易先生，安排湯唯飾演的王佳芝和阮德鏘飾演的歐陽靈文假扮麥氏夫婦，訛稱經營貿易的生意人，租住一間洋房充撐場面，並作為秘密基地。
那幢三層高的舊洋房，拍攝期間地址一直保密，那裏原來是位於港島區西半山寶珊道盡頭的一所古老大屋，現址巳廢置，房子內破舊不堪，屋前更是雜草叢生。

偉仔努力再闖高峯

錢嘉樂在拍攝期間，早聞梁朝偉和湯唯將會有大膽床戲，但料不到出來效果比預期的激烈，他說：「偉仔真係一位好努力嘅演員，佢已經貴為影帝，又唔係新人，不過拍攝《色》片期間，我喺片場無時無刻都見偉仔好努力去思考個角色點樣演繹，可能佢真係人望高處，佢希望睇吓遇到一個好導演（李安）之後，自己仲可以演到邊度。」

湯唯純樸依然

至於新人湯唯，錢嘉樂高度表揚她是一個難得的演員，他說：「記得我第一次識湯唯時，同佢喺香港首映時再見面，佢嘅眼神同表情都冇變過，一樣係好淡定。湯唯冇因為《色，戒》好評如潮而變得囂張，依舊畀人好舒服嘅感覺。」
在《色》片中戲份不多的嘉樂，與扮演愛國學生的對手戲最多，李安為了讓演員在開工時相處融洽，早在開拍前安排了類似大學入學的迎新營，嘉樂說：「李安搞咗間學校，佢安排我哋一齊打羽毛球同籃球，以增進感情，一班學生入營時間較長，佢哋嘅相處真係好似返咗校園生活一樣，我戲份少啲，入營時間變相短啲，但係一樣好開心。」