王菲嘅愛郎謝霆鋒,早年由馬己仙峽道搬去裕景花園居住,但住咗兩年,最近又由裕景花園搬番去馬己仙峽道,好似有鋪搬屋癮咁。
相反雖然王菲前年用三千四百幾萬買咗龜背灣一號屋,但都未有搬過去嘅念頭,到𠵱家都重係住喺九肚山,認真長情,就好似佢對男友霆鋒一樣。
必經之路
早排有消息話王菲見間屋丟空咁耐,決定開價四千萬放盤,後來佢經理人陳家瑛幫王菲否認,話王菲諗住裝修好間屋之後再出租至真。
不過馮仁昭噚日去開龜背灣嗰頭探朋友,發覺喺王菲同佢班鄰居入屋嘅必經之路,就加咗一道閘,上面寫住「私家重地閒人免進」,保安明顯比前加強咗好多。
佘詩曼同陳浩民有進展
佘詩曼同左慧琪噚日去咗鯉魚門廣場宣傳無綫活動,佘詩曼啱啱同緋聞男友陳浩民喺上海拍完劇,佘詩曼話:「我哋愛情就未有,但友情就有進展。」
不過阿佘就呻話喺上海拍劇時,因為天氣太凍,拍劇又辛苦,於是忍唔住喊起上嚟,唔知佢個緋聞男友陳浩民有冇安慰佢呢?
文頌嫻被保安喝罵
文頌嫻同陳浩民噚日去咗奧海城宣傳今晚首播嘅無綫新劇《天子尋龍》,佢哋大派紀念品畀觀眾時,場面好混亂,重要暫時中止㖭。
文頌嫻本來想將手上嘅禮物遞畀台下嘅助手,但無綫保安以為佢重喺度派禮物,大聲喝止,搞到文頌嫻面燶燶,佢話:「我講佢都聽唔到,可能佢耳仔有問題。」
BoBo拍鬼片有排驚
陳文媛(BoBo)噚日喺尖沙嘴為《數頭暴龍03大電影》宣傳活動做頒獎嘉賓,BoBo接咗劉偉強導演執導嘅鬼片《凶樂園》,三月會去泰國拍外景。
BoBo話去到泰國拍鬼片真係好驚,不過到時導演會帶佢哋去見白龍王,有高人照住都定啲。BoBo又話呢排咁多是非,應該請白龍王幫吓手。
張文慈電髮搞新意
張文慈噚日喺尖沙嘴幫一間時裝店做頒獎嘉賓,見佢電咗個新髮型。張文慈話過年後先再為電影《絕種好男人》開工,趁住𠵱家唔使拍戲,所以轉吓新形象,搞搞新意思。
張文慈重諗住拍完部新戲後,走去學電單車,如果搵到男朋友嘅話,一定要個男友坐車尾一齊去兜風。