【廁所有啲嘢】孫慧雪浴室爆玻璃門 工人姐姐成手血
蘋果日報 2020/06/15 13:48
浴室爆玻璃孫慧雪
（facebook圖片）
孫慧雪最近可謂多災多難，連番遇上家居意外，認真頭痛！雪雪昨日在facebook上載一張浴室爆玻璃的相片，見到一地都是玻璃碎，非常誇張，她留言：「多災多難，繼上次客廁熱水爐爆水、然後到主廁爆水，兩次都爆到瀑布咁，今次最金，因為今次係玻璃瀑布，成個玻璃幕門爆咗，姐姐成手血，我哋成腳血。」
不少網民都留言關心，雪雪透露自己當時不在家，但執玻璃時仍然整傷自己，她續說：「因乜事爆玻璃？其實係工人姐姐沖完涼，好大力閂門，然後就爆咗，好彩當時無人喺屋企，我、老公同BB都喺街，不幸中之大幸係姐姐只擦損手，但老公執玻璃嗰陣，啲玻璃粉插晒手，我就抱住囝囝唔畀佢落地行，點知自己就踩落啲好細又睇唔到嘅玻璃碎！好彩係小朋友無事！多謝大家關心！」
有人提議拜四角，雪雪說：「其實我係基督徒，不過之前工人姐姐成日話見到嘢，屋企人為求安心，幫我搵咗位師傅上嚟睇，嗰位師傅話我廁所有啲嘢，哈哈，然後已經裝咗長明燈。」
孫慧雪昨晚發生家居意外，整塊浴室玻璃門粉碎，工人姐姐擦損手。（facebook截圖）
孫慧雪和老公執玻璃時，亦不小心被玻璃粉弄傷流血。（facebook圖片）