【賢仔Call馬】對手弱兼強配 今次真係黃金機會（廖浩賢）
蘋果日報 2019/12/10 21:16
問鼎高峰廖浩賢賢仔call馬
問鼎高峰今次改配潘頓值得重視
大戰過後，周三（11日）報名馬依然踴躍，繼續有三組四班1200米，雖然報名馬多，但真正有實力份子唔多，變相有多組強弱懸殊場合出現。
練馬師方面今期睇好高伯新，兩匹王牌馬都配上潘頓，其中「問鼎高峰」抽一檔起步，加上快馬無多，可輕鬆守包廂位，已有十三個月未交代之馬，黃金機會在此。
第二場四班千二米，呢組識贏馬寥寥可數，焦點落在「肥仔」和「同盟力量」身上，「肥仔」韋達接手後落足心機操練，經常見練者親自快跳，轉倉後跑得最好就係配雷神，今仗抽八檔，未致於太差，當然值得重視。
「同盟力量」上仗係賺盡形勢贏馬，今次情況大同小異，晨操表現周身力，觀感更勝上仗，但要留意孭133磅，究竟有多少影響。
個人最鍾意「問鼎高峰」，無礙上仗一步無跑錯下僅取第五，但要留意所輸對手「如真如假」及「開心人生」都係準三班馬，相比今次對手差一大截。
此駒今次換潘頓抽一檔，點秤都比用郭能更高勝算，只要對手稍一失誤，就有權坐正。
「自由旺」抽二檔放頭跑，在別無其他選擇下，用黃皓楠孭114磅，四重彩配腳要拖埋佢。