華將吳嘉晉近季艱苦經營，某程度上只靠師傅告東尼關照力撐，而告仔一向十分照顧本地騎師，好似上季就曾試過安排被喻為今屆準馬王嘅「馬克羅斯」，交由吳嘉晉連下三城，事後看來，真係有心益徒弟！

雖然本季「馬克羅斯」策騎權就輪唔到吳嘉晉，不過騎者季內唯一頭馬，依然仍係師傅告仔提供嘅「加州勇將」，只可惜吳嘉晉自去年11月贏完一場後，直至目前尚未有第二場頭馬出現；陣上經常策騎一類近乎爭勝零機會嘅馬匹，差不多九成座騎都係冷門身份，這個困局，就係佢目前嘅現狀。

不過嚟緊周三（21日）快活谷夜馬，吳嘉晉爭勝露曙光，事關除咗「加州勇將」繼續由佢操刀，爭三班1200米外，容天鵬馬房「凱旋號角」及何良馬房「大地威龍」亦交由這位華將執韁，座騎非太少，始終有得跑就有機會。

單計「加州勇將」，馬匹上仗表現突然回勇，在吳嘉晉胯下殺入大冷Q腳，騎慣騎熟，亦慶幸告仔今次不會將吳嘉晉換掉，屆時若然抽得好檔，人馬隨時可重溫贏馬美夢。