杜可風與白海聯合導演，杜可風監製嘅獨立電影《白色女孩》，搵嚟袁澧林擔任女主角，日本男星小田切讓飾演外地人角色，故事反映香港困局，鼓勵香港及港人探索，以唔同角度覓出真正屬於自己嘅自由空間。戲中穿插廣東話版《但願人長久》，二人形容：「係懷念一個人，懷念一個地方。」

故事題材講述香港最後一條漁村，導演白海自己係土生土長嘅香港人，18歲離開香港，08年回流，以前喺大潭嘅屋企附近有條漁村，可以喺附近泛艇，有唔少街坊漁民同佢打招呼，但回流返嚟後一切已經面目全非，白海話：「我一直想拍自己嘅電影，第一個故事一定要關於香港，返嚟之後就開始寫漁村故事。香港200年前只係一條魚村，好多嘅文化、方言、咸水歌，已經消失晒，香港面臨情況就係咁。」白海話香港好獨特，但係呢個地方有一個截止日期：「呢樣嘢好特別，生活喺呢個空間會點做呢，我返港期間經歷好多嘢，令我同杜可風將呢幾年發生嘅事情，逐漸滲入我寫嘅故事。」白海慶幸，大澳仍能保留獨有文化：「仲有釣魚生活，老人家、小朋友、從事漁業嘅漁民，幾乎其他地方都冇，大嶼山又發展，又有港珠澳大橋，香港政府想將呢樣嘢發展成為一個香港同大陸之間嘅接點，唔係話要反對，但要發展都要顧及當地人民想要啲乜。」

34歲嘅白海仍與爸爸媽媽同住，佢坦言：「香港無論各方面都冇自己生活空間同私人空間，所以《白色女孩》講佢住喺棚屋冇私隱，因為棚屋冇牆，做乜嘢啲街坊都見到晒，當你冇空間探索時，唔知自己點表達，戲中的白色女孩被困棚屋入面，有兩個空間好特別，就係海同山上嘅廢墟，我一直喺海邊長大，杜可風都係，因為佢係行船，海對我哋嚟講係象徵自由，冇人管制，係一個可以自由發揮嘅空間。」白海透露，《白色女孩》花千萬拍攝，籌備5年時間：「我如果冇經歷個過程，齣戲唔會係咁，如果我想走捷徑係可以，3年前已經可以攞大陸錢來拍，不過如果係就要喺大陸拍，要用大陸演員，出來嘅故事就唔係咁樣。」

喺電影圈有一定成就嘅杜可風笑指，香港土地問題都係佢要面對嘅問題：「我都只係租住服務式住宅。」杜可風以廣東話說：「香港好特別，語言就係文化，我哋想分享將來嘅想法，我哋唔做邊個做，好多人都唔會做，我哋一定要美化香港。獨立電影，係要對投資負責，但亦要講出想講嘅嘢。」戲中袁澧林所演繹嘅角色唔可以出去睇清楚外邊嘅世界，杜可風話：「佢代表期待，肯定佢嘅特別能力，肯定香港嘅能力。而小田代表帥哥，佢唔係呢度人，睇嘢有唔同嘅角度去睇，睇嘢應該張開雙眼並享受。最後佢兩個都揾到佢哋嘅空間，知道應該點樣做。」白海補充：「小田代表外國人，用另一個角度睇番自己，先至知道自己究竟係點，佢個角色揾到個儀器觀察珠明村。」

更多娛聞，喺晒《娛果》
http://fb.com/appledailyent