不過,毫子股嘅威力不容忽視,有四間公司佢或者佢嗰仔做大股東,包括中富控股、正輝中國、北京時裝,同埋建星環保,前三者都係揸住差不多27%,而建星則揸住31%。加埋另外兩隻北方興業同埋馬斯葛,全部都係毫子股。
受到金勞詹病重嘅消息影響,除咗馬斯葛叫做升咗少少(1.9%)外,其餘五隻股噚日收市全部碌晒落嚟(見附表),埋單計數,金勞詹嘅股票王國市值蒸發咗成3000萬銀。
另外,根據金勞詹向交易所嘅申報,佢揸住香港體檢同埋駿雷國際少過5%,前者跌、後者升,但華華聽聞佢已經沽晒呢兩隻股,所以升跌應該同老詹無關。