現年44歲嘅孫佳君喺13年復出拍戲，雖然佢已經係兩子之母，但係喺工作上依然好搏殺，上年佢喺電影《無雙》嘅演出就得到唔讚賞，孫佳君話：「好多謝佢哋畀呢個機會我同兩個超級影帝合作，每一日都緊張，但係亦學到好多嘢，真係好有滿足感，我希望將來可以演出多啲唔同角色。」

不過自從孫佳君同米芝蓮三星廚師Olivier Elzer分手之後，一直冇聽聞佢有新戀情，孫佳君話以前因為阿仔仲細，所以擺咗好多時間照顧佢哋，o依家佢哋已經大個仔，所以可以畀番啲時間自己，做番啲自己想做嘅嘢，唔會好心急拍拖。

日前《蘋果》喺尖沙嘴半島酒店見到孫佳君，當日見佢打扮得好casual、髮型越剪越短，同一個女友人一齊飲嘢度過假期，佢哋兩個傾得好開心，坐咗差唔多兩個鐘，臨走嗰陣，孫佳君仲叫女友人幫手揸機，喺靚靚裝飾前面影相，之後傾多幾句，最後齊齊上咗架黑色七人車離開。睇番佢嘅微博，見佢喺大節日都係擺咗啲同女友人慶祝嘅相，睇嚟佢真係講得出做得到，暫時唔想拍拖！

精選娛聞，喺晒《娛果》
http://fb.com/appledailyent