四姨太夜會「情聖」 - 李八方

蘋果日報 2002/05/20 00:00


賭王何鴻燊日理萬機,連四姨太梁安琪亦精力充沛。話說賭王同四姨太前日先雙雙去咗澳門馬場,做耀榮娛樂盃嘅嘉賓,佢哋重喺馬場遇到早排在上流社會盛傳,話係賭王「五姨太」嘅女主角鄺美雲,三人碰面,唔單止一啲都冇尷尬,佢哋重好好傾,同埋搭晒膊頭影合照,狀甚老友。

大熱天時皮草護體
四姨太梁安琪前晚剛自澳門返港,昨日凌晨時分,又見佢與一名穿西裝男子,同一班友人去咗中環蘭桂坊消遣,同行重有任職公關嘅鄭紹康。四姨太連走兩場,精力異常充沛,不過唔知係咪因為時間好緊迫,佢連衫都冇換就趕住下一場。八方覺得最奇怪係大熱天時,唔知點解四姨太重拎住件好名貴嘅皮草,真係令人費解,莫非四姨太蒲嘅地方冷氣好勁?
四姨太昨日凌晨同西裝男子蒲蘭桂坊,據八方所知,呢位同行嘅西裝男士姓程,已婚,係大律師,同四姨太私交甚篤,相識多年,呢位程姓大狀為人風趣幽默,人面甚廣,有佢喺度乜場面都唔會有冷場,八方叫佢「情聖大狀」,希望博君一笑。
而據知四姨太出席嘅聚會,重有林建岳舊愛林學華(NancyLin)同馬薛芷倫到。


傳真︰2623-9278
電郵︰[email protected]