可能係本年度球壇最佳笑話！球星們近排齊齊放暑假，但放上社交網站嘅唔係開P就係攬女相，睇得多都厭…效力英超史篤城嘅前鋒高治就反其道而行，日前上載一張餵長頸鹿食嘢嘅相，caption寫上「夏天於我而言係同家人共聚嘅時光。（Summer for me is about time with family.）」明明得一支公，咁屋企人呢？原來身高2米01嘅高治係笑指自己條頸同長頸鹿一樣咁長，大家先係一家人，呢啲咪英式幽默囉！

高治呢張相上載唔夠兩日，已經狂吸31萬個like同14萬次轉發，球壇中人好似拜仁慕尼黑後衛曉姆斯、阿仙奴名宿伊恩胡禮亦分別轉發同留言大讚好好笑。36歲嘅高治可謂社交網站高手，又識跳機械人舞咁盞鬼，又有靚靚老婆艾比，第時退休轉做KOL都唔使愁啦。