田蕊妮正式加盟星娛樂做歌手，今日佢喺觀塘舉行加盟儀式兼為新歌《兩口子》嘅MV進行首播，監製舒文、樂易玲同吳業坤都有到場支持。

著住紅色花裙嘅阿田，笑言心情緊張過結婚，但係一見到同門師兄坤哥又忍唔住笑。原本唱片公司安排坤哥坐低飲茶，不過坤哥唔敢坐，最後係阿田坐喺度斟茶畀師兄，坤哥仲喺心口抽左封利是出嚟畀阿田，真係好搞笑。

然後，大會播放由阿田親自執導嘅MV《兩口子》，男主角係廣告男神黎學勤，但個MV去到最後有彩蛋，黎學勤竟然變左阿田老公杜汶澤。阿田仲話：「係咪好靚仔？其實我想講，無論世人點睇都好，老公喺我眼中都係我男神，我都係佢女神。」真係閃到盲啦！

問阿田點解坤哥震哂咁？阿田笑謂：「係囉，頭先我都震呀，佢出嚟就咁樣，其實平時成日喺電話騷擾我架，成日話『師妹，請師兄飲咖啡啦。』」佢仲話坤哥其實成日欺負佢，但自己又忍唔住會寸佢。

講到MV揾老公杜汶澤客串，有無重金禮聘？阿田話：「佢一定要嚟啦，嗰日仲幫我影埋相，不過我都有喺屋企sell下橋畀佢嘅。」MV入面有喺浴室玩水嘅溫馨場面，問阿田現實生活中係咪都係咁？佢笑言已經保守咗，仲一面正經咁話：「同另一半相處嗰啲唔可以拍出嚟，唔好講咁多。」不過佢就話老公都好滿意個MV，阿田仲有意繼續再為MV執導。

至於MV有老公演出，怕唔怕TVB會唔播？阿田話：「我無諗呢啲呀，淨係諗個MV拍出嚟靚唔靚咋。」

精選娛聞，喺晒《娛果》
http://fb.com/appledailyent