群眾壓力，就算面對幾大嘅高牆，都要勇於發聲。因為，希望在人間，可能會有奇蹟嘅出現。禮拜四早上，俄鋁（486）喺半島酒店將會舉行股東會，孫柏文當然會出席。除咗代表自己嘅股權外，亦會揸住fan屎賜我嘅proxy入去乜叉都投反對。

原因好簡單，就係我哋呢批喺香港嘅小股東，要求俄鋁派息。

如果大家都會去，當日我會帶埋多件已印有「冇息派、冇計傾、Where's Our Dividend？」嘅T恤。而如果你同我一樣，要俄鋁嘅管理層知道我哋嘅要求，就問我攞件T恤笠上身。

俄鋁啲低級職員亦唔好諗住DQ我哋入場，因為咁做，我一定會申請司法覆核，void咗你個股東會。到時你道歉都冇用，隻鑊孭硬。各位股東們，禮拜四不見不散！

講到俄鋁，見David Webb話美帝下一步會有如舊年對俄鋁咁，透過OFAC制裁大陸國企，包括喺香港上市嗰啲。點知彭博社嘅水皮撰稿員，居然將重點放喺「美國基金就要沽出手持嘅相關股票。」

OMG，你有冇渣啲呀。如果係咁制裁，係講緊連幫你營運公司食堂嘅外判商，都要即時停業。唔好講話啲銀行全部要你閂戶口，你啲客戶都找唔到數俾你。如果唔係，連嗰啲同你繼續做生意嘅人，都會被制裁埋。

最後，上週「一個月HIBOR」係咁爆上破海嘯後新高。曾淵滄博士話係因借港紙買美元賺息差嘅倉喺度拆倉。而唔係因送中條例，一但通過，只要大陸要求，香港未開始審，即時要凍結香港資產下產生嘅恐懼走資所致。

我想問曾博士，如果買咗美元嘅港幣，轉番做港幣，港幣嘅貨幣供應唔係應該增加，銀行同業拆息應回落先係？我腦中嘅迷思未解前，我點都係信走資是HIBOR爆升的原因了。

孫柏文
-----------------------------
你撐蘋果 我捐$1
支援反送中抗爭者