【與前夫欠溝通】陳煒願為醫生男友付出 滿足現狀未計劃再婚
蘋果日報 2020/03/21 16:10
結婚醫生男友陳煒顏志行
（資料圖片）
亞姐出身的陳煒在2008年與台灣商人顏志行結婚後宣佈息影，但到2012年，煒哥復出並加入無綫，當時與萬綺雯相比，機會比較遜色，大多數只是配角，其後到了《梟雄》、《宮心計2之深宮計》、《果欄中的江湖大嫂》、以及《法證先鋒4》，總算令她為一姐。日前煒哥接受商台節目《1圈圈 星光背後》的訪問，談到當年的際遇，會否覺得被輕視？她說：「我自己又唔係太介意，因為嗰陣都結咗婚幾年，生活完全脫離咗娛樂圈，之後拍番戲都要啲時間warm up，每個人畀人嘅感覺好唔同，好多嘢都唔可以人比人，如果你問我，我只要覺得有戲出，對自己有信心，觀眾同監製自然會睇到。」主持又問當時在無綫的酬勞，與亞視相比又會否差很遠？煒哥說：「最初簽嗰陣，真係差幾遠，不過我覺得係機會，貼錢都冇所謂。」
提到她第一段婚姻，煒哥說：「嗰陣因為亞視冇嘢做，惟有同老公一齊走，去咗台灣、北京同泰國生活咗4年，當時冇乜朋友，每一日只係煮飯做家務，慢慢覺得自己喺社會冇乜價值，到咗2012年，因為屋企人唔舒服，而且前夫喺泰國嘅生意唔好，所以咪決定返嚟，之後就返番去拍劇。」最後前夫主動提出離婚，煒哥說：「嗰陣大家行嘅路同思想有分歧，佢睇得出自己唔係咁想付出，所以咪同我分析，如果我喺香港拍戲會有番啲人生價值，工作上會令到個人會開心啲，呢樣嘢我係認同嘅，所以咪決定分開。」
不過在去年7月，煒哥被爆戀上醫生男友陳國強（ALDOUS）：「最初大家係朋友，相處咗一年先再開始，佢唔係一個浪漫嘅人，但係我哋都知道溝通嘅重要性，兩個人都知道點樣去交流，同埋願意去付出，先可以維繫一段感情。以前同前夫一齊，因為佢成日都要出去開會，我哋好少溝通，只係聽佢講，慢慢變成永遠唔使溝通。」至於會否再婚，煒哥說：「我哋嘅感情穩定，都會憧憬結婚，但係而家未係時候，太快喇！」
陳煒直認當日加入無綫的酬勞比亞視低！（資料圖片）
陳煒與醫生男友感情穩定，但未有結婚打算！（資料圖片）
陳煒當年為前夫，不惜退出娛樂圈。（資料圖片）