港女A：「你就好啦，識到個會計師，以後唔使憂啦！」港女B：「係就係，但同佢一齊好鬼悶，兼且樣樣計住晒。」
以上一番對話，係敏妮喺地鐵上「被迫」聽到的，要知道喺地鐵車廂內，經常都會被迫聽到人哋嘅家事。
啱啱過咗嘅星期五，同因念、UncleRay食飯，講開以上嘅對話，UncleRay話：「邊個話會計師一定唔使憂！」敏妮反駁，做會計師無論經濟好壞都唔憂冇生意噃。生意好，公司排隊上市自然要會計師計吓盤數；衰到好似金融海嘯嗰陣咁，都唔使憂，因為公司破產都要會計師計數。
UncleRay間公司，主要係幫計劃上市嘅企業做顧問工作，所以認識唔少會計，佢話會計師嘅工作唔會有好大變化，所以一旦上手，一個只得一兩年經驗嘅後生仔，同一個有幾十年經驗嘅會計，做出嚟嘅嘢唔係差距好遠。講到呢點，敏妮知道UncleRay嘅意思，試諗一個入行一兩年嘅後生仔，同一個十年經驗嘅會計，做出嚟嘅嘢差別唔大，但人工薪酬嘅差距應該唔細，你係老闆都識點做啦。