之前樂華邨巴士總站因為司機投訴冇地方休息，九巴就整咗個臨時休息室，等一眾車長有得歇吓腳，以便炎炎夏日有個地方遮陰，點知房署竟然圍封個休息室，仲要求48小時內搬走，呢種官僚到不近人情嘅處事方式引起公眾關注。

民建聯立法會議員劉國勳一直有跟進呢件事，今日喺Facebook預先報喜，引述地政署已經回覆咗，將會喺日內正式批出有關申請，車長唔需要再做到有氣無埞抖。

劉國勳仲因此事做咗個小統計，原來全港嘅九巴巴士站中，有217個地點係需要設車長休息室，當中169個已經整咗，另有48個係有需要但未設置，39個已獲運輸署批准並進行公眾諮詢，仲有9個仲等緊房署審批，當中有啲已經等咗6年幾都未批出，所以嚟緊會向房署追數，逐個個案問返進度，希望可以改善車長工作環境。

嘩，咁著力幫拖變身「巴士大使」，唔通佢想同「鐵路專員」田北辰平分秋色？