童星出身、曾演出韓劇《懷抱太陽的月亮》嘅16歲女星金裕貞，有個大3年嘅家姐同大6年嘅哥哥，之前金裕貞跟哥哥嘅合照公開時，網民已經驚嘆二人似龍鳳胎，近日有網民拎埋金裕貞家姐張相對比，大嘆：「佢哋根本係三胞胎！」真係有咁似樣？

網民公開多張金裕貞家姐金妍貞嘅自拍照，而金妍貞戴上鴨舌帽、露上精靈大眼時，又真係幾似妹妹金裕貞，而網民就留言「唔睇年齡以為係金裕貞嘅雙胞胎家姐」、「金裕貞一家人都好似」、「其實金裕貞有幾多個孖胎兄弟姊妹？」、「全家都好靚」等，亦有人表示：「三兄妹細個時更加似樣。」