上星期，筆者叫沽，大市就向上升，收到不少電郵，有查詢、有臭罵。其實筆者於20300左右開始建淡倉，最高都只是20788，十分無奈再冇心機開電郵；早兩日期指回調至19933，可能市面上少人看淡，收到不少讚美電郵。人家說娛樂圈跟紅頂白，想不到財經界更加立竿見影，明白財經要睇效應，但周期不用如此短暫。其實要連貫後市絕不容易，連諾貝爾得獎人都大錯特錯，要做到例不虛發幾無可能，除非神算保羅上身，反正目前策略較簡單，盤中升穿昨日高位便減注應戰，注碼細點、看長遠點，唔使太大壓力，不如分兩期於本欄講講心得吧！
市場有云「趨勢是朋友」，可是知易行難，相信大部份讀者們都試過在一個長期趨勢中損手離場，趨勢明顯，唔明自己點解犯錯？相信應該同心魔有關，做出錯誤的決定。

就以03至07年大牛市為例，當中最大調整莫過於04年間的宏觀調控，對資深投資者而言，相信仍歷歷在目。回顧這次調整，大市跌了二成三，回調了12周後見底回升。若以此作參考，相信大部份投資者都可避開金融海嘯這百年難遇的大災難，因為期指從07年11月第一個星期開始下跌，直至24600點剛好是23%，而大市跌到此水平亦剛好用了12周，所以一旦跌穿那個星期的底，即23972，長期大趨勢就有所改變。
投資者理應先避其鋒，減持手上一半的股票以鎖定利潤；而反彈後再次跌穿反彈前的底，即20450，便應以清倉應對。但事實上當期指跌穿23972，大部份投資者都不甘將手上的股票沽出，結果大市一跌再跌，直至跌到2萬才開始反彈，比原先要減持的水平再跌多兩成。後面的發展，大家都知道，但心理變化又如何呢？吸收到甚麼經驗？跟目前市況又有何關係？明天再續。

張士佳
mailto:[email protected]