台北將於今年8月主辦世界大學生運動會，不過自從台灣總統蔡英文上台後，中國對佢哋嘅打壓就越嚟越大；世大運日前就舉行9個團體項目，包括男女子籃球、男女子足球等嘅抽籤，不過就唔見中國個大名，暗示中國已經退出參與呢幾項比賽。台北市長柯文哲就幽中國一默，話中國代表怕咗台灣太熱情嘅民眾先至缺席。

不過中國傳媒就話，今次退賽同政治冇關，只不過因為3月世界U18冰球錦標賽，中國同台灣交手期間打大交，權衡之下，就決定唔派隊參加團體賽，不過仍然會角逐個人項目，代表隊規模都有4至500人。