(新增回應)

現年44歲「力王」樊少皇同34歲賈曉晨（JJ），拍拖以嚟，外界一直唔睇好戀情，結果二人排除萬難喺15年結婚。

婚後二人雖然喺大陸搏命搵錢，但一直努力造人嘅佢哋，終於成功陀B。今日凌晨JJ就喺微博貼咗一張着住白色短裙嘅相。相中見佢個肚已經籮咁大，而JJ更不期然將隻手揞住腹部，目測起碼有咗5個月身孕。JJ留言祝今日44歲生日嘅老公話：「蛋皇@樊少皇，全家祝你生日快樂！永遠幸福！」相中除咗有兩公婆所養嘅三隻愛犬，唔知JJ所講嘅「全家」，係咪仲包括埋肚裡面個BB呢？對於成功陀B，JJ透過經理人回應懷孕表示：「多謝大家關心，遲啲先回應大家。」至於樊少皇亦即時回應老婆話：「永遠愛你們。」

其實樊少皇兩公婆由拍拖到結婚，都幾經唔少風雨，婚前樊少皇被爆出「拋妻棄子」，到婚後，樊少皇又傳出欠債二百萬，追數佬仲追到上JJ將軍澳屋企。事後，JJ否認欠債話︰「我哋財政冇問題，朋友利用咗佢（樊少皇）張身份證借錢做擔保，佢朋友還晒嗰筆錢，但私下仲問佢借咗三百萬港幣仲未還。」(新聞連結： http://bit.ly/2eUsU4w )

一直對老公不離不棄嘅JJ，指樊少皇先係受害人。但事隔五個月，欠債事件又有新進展，欠款銀碼仲越滾越大。今年1月，債主正式入稟高院向樊少皇同其貸款擔保人，追討本金連利息約港幣835萬，雖然JJ話經濟冇問題，但兩公婆應該都仲有排煩。