學「攞命陳」話齋，全球金融環境十分唔正常，係人都要諗計為自己副身家增值，買金確實係一個好辦法，但買唔起金又點呢？華華就希望學惠理（ValuePartners）（806）主席謝清海咁，狂掃黃金相關股！謝清海響上月底增持瑞金礦業（246）138萬股之後，似乎仍然求金若渴，今次睇中內地唯一由一個半世紀相傳至今嘅百年老店、金飾製造商兼零售商「老鳳祥」！

A股上市的老鳳祥噚日披露，惠理響上月29日增持咗30萬股B股，持股量增加到5.07%，未來一年仲有意繼續增持！市場上N咁多隻黃金概念股票，點解揀呢隻呢？先講技術分析，內地近年婚慶市場火辣辣，舊年全國結婚消費係1.5萬億元人民幣，每對新人淨係用響珠寶首飾上嘅錢就高達6052大元！咁再用市場角度睇睇，老鳳祥呢檔150年老字號，華華淨係計自己響內地個班姨媽姑姐，加埋佢哋班friend，每逢買金飾，都係幫襯呢檔，而呢班三姑六婆的群組，每人每年幫襯的次數，至少都三、四次……照咁睇，唔買金都真係可以諗諗入啲「老鳳祥」！