回歸前後，曾經係獅子行最高華人管理層嘅滙豐銀行前副總經理劉智傑，2000年離開後，低調養生，埋首鑽研俗世同心靈財富──刨馬經、炒股兼佛學。佢向來敢言、牙擦，2009年曾公開大鬧滙控（005）前主席龐約翰累死滙控，佢心裏面仲有團火，決定下周喺電台開咪，月旦時事。
69歲嘅劉智傑靜極思動，應數碼廣播（DBC）CEO羅燦邀請，下周二起，逢周二及周五主持早晨財經節目《贏在起跑線》，天南地北，論盡政經形勢，講得興起，仲可能分享埋佢嘅「佛學馬經」心得㖭。

佛學融入賽馬

佛家有三戒，戒貪慎癡，佢話賽馬比炒股穩贏，關鍵係不可過貪，不要憑馬匹外觀或對騎師愛惡，偏執落注，賽前亦要按馬匹往績、晨操表現同賠率做足分析，莫存僥倖。佢最勁試過買「二穿三」，落注750蚊，贏170萬元，佢亦冇貪，捐咗三成獎金。
劉智傑1965年加入滙豐，名副其實紅褲仔出身，由分行、分區經理晉身為獅子行首位華人副總經理，昔日銀行編制較簡單，佢老頂滙豐銀行前總經理施偉富，已經等同今日執行董事級別。
佢一向敢言牙擦，主管零售銀行業務時，彈過金管局，認為應放寬七成按揭上限；2009年獅子行世紀供股，佢又公開鬧過購入滙融嘅龐約翰累死滙控。講到現任滙控CEO歐智華，佢寸嘴話，九十年代初歐生由日本調到香港，做滙豐司庫時，仲要「敲我度門攞嘢入嚟畀我簽！」

李華華
mailto:[email protected]

足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24