金像電影《樹大招風》道具領班張偉全，因管有22.3萬張拍戲時用的道具鈔票，被控保管偽製紙幣罪罪成，上月底判監4個月，緩刑兩年，引起業界不滿。噚晚「香港電影工作者總會」發新聞稿，表示金管局已同意簡化申請程序，以及增加中文網頁申請渠道。

對於金管局同意簡化申請程序，當中有12項較清晰指引，包括：道具鈔票面積必須比真鈔小或大20%以上；電影或電視製作公司的中英文名稱，需顯眼地印在道具鈔票的正面及背面；「Stage Money 道具鈔票」的字眼，需顯眼地列印在道具鈔票的正面及背面的中央；發鈔銀行名稱和「Promises to pay the bearer on demand at its office here 憑票即付」字句及簽名等，需在道具鈔票上刪除；申請人在複製及處理道具鈔票時，商業罪案調查科有權要求在場。(新聞連結： https://bit.ly/2MCvMAE )

黃秋生今早回覆《蘋果》時表示：「淨係要比真錢小或大20%，同埋要係正面背面印上明顯道具兩字，就已經唔使拍啦！其實有冇互相溝通過，拍戲嘅要求水準㗎？你估仲係粤語長片年代，油黑隻手當鎗咩？」秋生再補充：「即係如果拍爆炸，唔准有煙唔准有火唔准有聲，咁點爆？」

另外，導演彭浩翔就表示：「要一面印「道具」係冇問題嘅，但要大或者細20%呢個係戇X，係戲裏面會睇到。」佢更提議：「一面印好大個字道具咪得囉，印咗就知道唔係（真銀紙）。」

精選娛聞，喺晒《娛果》
http://fb.com/appledailyent