楊冪日前現身多倫多電影節，出席新戲《寶貝兒》全球首映會，由於全程只說咗一個「嗨」字，又以時差同趕時間為由，拒絕接受傳媒訪問，同fans互動時更表現冷淡，被台灣傳媒質疑耍大牌：「那她大老遠飛來多倫多做甚麼？」、「只給拍照發公關稿就好了，讓我們在這裏白等那麼久。」

報道指楊冪現身紅地毯時，fans開心尖叫，佢點頭微笑就匆匆入戲院，令喺外面等嘅傳媒感到錯愕，而喺戲院內，全部劇組上台致詞，身為女主角嘅楊冪卻笑容牽強，當主持人遞咪畀佢時，楊冪竟然耍手拒絕，只對觀眾講咗個「嗨」字，令fans同傳媒都好失望。

楊幂被爆耍大牌後，有大陸傳媒訪問其經理人公司，工作人員則指報道失實，強調係因為當時眾人喺台上致詞時，郭京飛笑言：「不用說英文吧，英文交給楊冪。」所以楊冪講咗一個「嗨」字，而首映後楊冪有回答觀眾問題，工作人員強調楊冪喺當地接受咗電影節官方採訪及至少五間媒體訪問，並非「拒絕採訪」。

精選娛聞，喺晒《娛果》
http://fb.com/appledailyent