【讚煒哥真材實料】筱靖全力贊助? 45歲袁潔儀飲啤酒拍床戲壯膽
趙哲妤袁潔儀筱靖施綺蓮林雅詩
筱靖、袁潔儀、林雅詩、趙哲妤、施綺蓮等,噚晚喺中環海濱出席香港貿發局美酒佳餚節,筱靖開德國餐廳,今年第一次進駐美酒佳餚節,邀請一班好友撐場,為攤位搞開幕,筱靖同袁潔儀一齊做訪問,佢豪言已邀請友人鍾意可以隨時嚟飲酒,全由佢請客,袁潔儀話:「係呀!我哋得閒就嚟,以前筱靖都成日請我哋飲嘢,請到我哋都有啲唔好意思。」
筱靖第一次進駐美酒佳餚節,初步估計生意都應該ok,問到佢酒量如何?佢好有信心咁講:「睇吓啲人會唔會隊得醉我!」袁潔儀亦自言酒量唔錯,因為之前同老公要喺大陸應酬,有時傾生意時,兩公婆都會合作間住咁飲酒,所以唔怕都頂到兩嘴。
筱靖又話會無限量sponsor袁潔儀飲啤酒,特別係拍戲時,好似拍床戲、親熱戲,俾佢飲啲酒可以超越銀幕,袁潔儀稱其實都會,覺得有時拍接吻戲啲對手未必接受得到,例如無啦啦有個大肥佬做對手戲,都好難即刻入戲,飲少少酒會易入戲啲,問到佢有冇呢啲親身經歷,袁潔儀笑言:「咁又冇噃!」
袁潔儀現時同無綫有合約,佢希望由亞視過咗去無綫嘅同事有更多機會,問到佢羨唔羨慕「煒哥」陳煒,無綫特登開咗個飲食節目畀佢?袁潔儀謙虛稱:「煒哥呢啲係真材實料嚟,不過如果你要我……我自己喺國內走咗咁多年,老公又喺大陸,自己喺唔同嘅省分都識好多人,而我嘅落腳點喺廣州,都可以將當地美食帶俾觀眾。」咁會唔會同公司自薦,袁潔儀笑言等同啲監製熟啲先再反映吓。