當年今日
關於我們

【李八方online】張曉明第一次見杜葉錫恩係做接待員

蘋果日報 2015/12/12 06:00

張曉明李八方ONLINE杜葉錫恩

前立法局及市政局議員杜葉錫恩日前離世,中聯辦主任張曉明今晚出席紀念杜葉錫恩活動,致辭時諗返同杜葉錫恩第一次見面嘅情況,個時係1994年5月,當時杜葉錫恩因港事顧問嘅工作去北京,張曉明當時接待杜葉錫恩同佢老公,到第二次見面已經係前年元宵節,張曉明去咗杜葉鍚恩喺慕光英文書院嘅屋企拜年,當時杜葉錫恩已經年邁,佢哋無咩交談,但覺得杜葉錫恩嘅思緒仲好清晰,點知事隔兩年就恩與世長辭,但張曉明話她嘅民主遺志會長存。

佢大讚杜葉錫恩係真正嘅民主鬥士,話佢係大是大非嘅議題上從來唔含糊,對民主同正義議題熱心追求,由英殖年代已經反對港英政府嘅殖民統治,想當年六、七十年代,民意仲未受到重視,杜葉錫恩已經願意聽市民心聲,好似1966年收集民意反對天星小輪加價,帶嚟香港首次大型社會運動。

張曉明又講到,杜葉錫恩喺九十年代起,已經好支持中國政府收返香港,鬧港英政府97回歸前偷步推行政改方案,又讚中國政府履行對港人一國兩制嘅承諾。張曉明形容杜葉鍚恩追求嘅公義係真公義,重提佢贊成基本法23條立法同反對佔中運動。

張曉明仲覆述杜葉錫恩生前嘅言論:「民主應從心裡出發,不偏不偏地坐下來,討論出一個公平的妥協,民主不是一步登天。」佢仲乘機借杜葉錫恩嚟鬧泛民,話「某些人」嘅不民主行動,阻礙香港民主發展,仲引述杜葉錫恩曾經講過:「不是你說你是民主派,你就是民主派。」既然張曉明高度讚揚杜葉錫恩重視民意,幾時教特首都要學習吓,聽吓市民心聲呢?