再講柏芝悶到嘔
馮仁昭四圍超:小春自爆鐘意蕭亞軒

蘋果日報 2004/04/28 00:00


陳小春平時一提到張栢芝,就硬係唔肯講多兩句嘅,早排佢重猛話叫栢芝同謝霆鋒結婚,想同栢芝劃清界線嘅心係人都知啦!但係勢估唔到佢噚日竟然公開表示情傾蕭亞軒,究竟小春係想轉移視線,定真情流露呢?
陳小春噚日喺台灣做宣傳,佢一邊表演搖珍珠奶茶,一邊係咁同人討論飲奶茶,點知愈講愈興奮,自爆鍾意蕭亞軒。小春被問到同圈內人定圈外人拍拖辛苦啲,小春竟然用國語話:「我喜歡蕭亞軒,我要去追她!」小春自認目前單身,佢話如果蕭亞軒冇男朋友,佢會展開追求,全程重一句張栢芝都冇提過呀!陰功!

同圈內人拍拖唔避忌
不過當俾人問到點追法,小春又詐詐諦咁話:「聽說追她的人都很有錢,我應該沒有資格了,因為我又沒錢,不知道她會不會不喜歡我?」跟住小春重好溫馨咁話能夠相愛係福氣,如果同圈內人拍拖,亦唔會因為傳媒關注而有所避忌,皆因佢結唔結婚唔係傳媒話事,傳媒亦唔會幫佢生仔,佢只會重視佢嘅另一半,同伴侶一齊維持感情,認真冧呀!
Boy'Z天有不測之風雲
Boy'Z噚日喺新城做訪問,Steven同Kenny趁住朝早得閒去咗西貢滑水,曬到臉紅紅,不過佢哋玩完返屋企,先發覺全屋浸晒,原來朝早落大雨,佢哋又唔記得閂窗,結果搞到水浸。嘩!天氣呢啲嘢又真係幾奇,呢頭曬到暈,嗰頭又可以大雨到水浸喎!

曾江想叨靚佬湯光
曾江同焦媛噚日去咗港台接受訪問,焦媛因為日日勤於練舞關係,搞到雙腳滿布瘀痕,所以曾江就勸佢做事唔好太認真,應該輕鬆啲。而曾江就話近排都收到唔少西片劇本,但好多都因為帶有辱華味道,所以佢都推晒,但係佢就好有興趣同湯告魯斯合作,因為到時嘅招待一定係皇帝式享受喎。

安雅紐約跳豔舞維生
近日台灣有人踢爆話安雅以前喺紐約做過夜店嘅豔舞女郎,噚日佢為新書《4999的印記》喺台灣設慶功宴,安雅搖頭歎息咁話:「每次我有新計劃,總會有不開心的事情發生,真是倒楣。」安雅承認七年前喺紐約一間四星級嘅餐廳做過舞孃,嗰陣佢二十一歲,做咗半年,佢重話嗰度一杯香檳收五百蚊美金,總之就係高貴地方啦。
文雋證實阿Sa奪金獎
文雋噚日喺尖沙嘴出席香港「星光大道」開幕典禮,有報道話蔡卓妍(阿Sa)唔滿意抽空去咗廣州出席「第四屆華語電影傳媒大獎頒獎典禮」,佢雖然同張栢芝同吳君如一齊攞到「港台最受歡迎女演員」獎,但就冇分名次,文雋就話:「其實根據投票結果,阿Sa係金獎,咁Mani(經理人霍紋希)唔使唔開心啦。」

徐小明促加快電視交流
張衞健、徐小明、石修等一行十二人上個禮拜以「香港電視專業人員協會」嘅身份到北京同有關部門進行交流,希望向佢哋提出香港電視製作喺內地所面對嘅困難。徐小明噚日喺尖沙嘴接受訪問時就話因為眼見香港電影都能成功打入內地市場,但電視方面就只係啱啱起步,所以佢哋希望透過此行能令香港電視工業喺內地有更大發展。
empty
蕭亞軒自出道以來緋聞不絕,估唔到連香港嚟嘅小春都做埋佢裙下之臣喎!
empty
張栢芝又唔止小春一個緋聞男友,即使小春另有新歡,佢都唔怕寂寞啦!
empty
Boy'Z
Steven(左)
empty
曾江(左)
empty
安雅
empty
文雋
empty
徐小明(右)