at17今個月22至224號會喺伊利莎伯體育館開騷，佢哋今日到商台宣傳第二手派台歌《18》，歌曲MV由盧凱彤（Ellen）另一半余靜萍執導，有祼露鏡頭，林二汶話拍時以為會尷尬，點知一除衫覺得自己有自戀。

Ellen同二汶比以前瘦咗好多，佢哋話體態上已經差不多，但狀態仍然要keep，因為到時會唱好多青春嘅歌，初步睇咗舞台設計原來要企上去一個升降台，有畏高嘅二汶話到時一定會捉實條欄桿。一直都傳演唱會兩人會跳舞，Ellen堅決話：「唔會跳舞，唔好再散播謠言，今次已經脫咗，等到再山窮水盡時先至跳啦。」二汶話佢哋窮得仲有愛。

有指Ellen簽約環球開發另一旗下品牌做一姐，佢話：「事業動向遲啲先至公佈，現階段係有同不同公司接洽，邊間就唔宣佈住，二汶都係接洽之一 。」二汶叫Ellen考慮簽佢，會照顧佢。Ellen就話情感上係，但銀包就唔係。

另外Ellen因為長期鼻敏感嚴重影響唱歌同生活，早前入院做咗一個下鼻甲切除手術，割了3厘米嘅肉，令到佢呼吸更暢順，已經病癒3星期，手術後會暫時失去味覺，至演唱會後，應會完全痊癒，已經諗定慶功時要食辣嘢尋找真正味覺。

更多娛聞，喺晒《娛果》
http://fb.com/appledailyent