塞翁之馬
null
洪慧( Maggie) 24歲
年紀輕輕已是兩間餐廳的總經理,但鱷魚頭藏不住老襯底,一開口,傻大姐性格表露無遺。
曾聽過一位老人言,人生來,就是為了學習失去。
此刻廚房內,眾廚子看着地上仍然熱烘烘的一塊牛扒,正為失去了食材而感到可惜,高跟鞋隨急促的步伐咯咯作響,總經理 Maggie不慍不怒,吩咐眾人清理好後,再重新煮一塊,「你睇,跌咗呢塊有啲乾,再煮過未必唔係好事。」年月去,方發現得與失,只懸於一念。
牛肉的香氣又再與空氣混和,飄逸於餐廳的角落。處理好意外, Maggie繼續巡視廚房的工作狀況。看到剛炒好的意粉,她興高采烈地上前搶着撒香料,手執香料的 Maggie,流露出一股少女味,這才想起她不過二十四歲。曾經,她亦穿着球鞋走過青澀之年,寫過「我的志願」,綠色小格子內,用鉛筆刻畫過「律師」二字。為了夢想,她拚命讀書,成績名列前茅。直到十七歲那年,因為家庭經濟陷入困境,她與妹妹之間要有一人揹起養家責任,身為姐姐的 Maggie最終決定輟學,「其實我知我繼續讀落去,係有能力完成夢想,不過好多嘢唔到你話事。」預科未畢業,她眼前茫茫一片,為餬口,她投身飲食業。由侍應生做起,本來無心戀戰,渾噩度日,卻又逐漸被食客觸動,「佢哋食嘢嗰個滿足嘅笑容,一日一日咁感染我。」開始重拾生命的熱忱,方才發現失掉馬兒,卻又成了一樁美事。
眨眼七年,當日腳踏的球鞋已變成今天的四吋高跟鞋。 Maggie七年間換了數份工作,雖離不開飲食業,仕途卻十分順利,漸漸做到管理層。畢竟年紀輕,權位重,是如魚得水,還是高處不勝寒?憶起以往於大集團做管理工作,她莞爾:「係啞巴吃黃蓮,我講咩啲人都話我仲細,識啲乜,冇人聽我講嘢。」她只好躲起來啜泣,後來發現哭乾眼淚也於事無補,決定做好自己本份,其他事情不再上心。果然,努力被當時上司看在眼內,對她多加重用,「如果我仲讀緊書,邊有今日咁硬淨嘅我存在。」不再自怨自艾,因為她察覺到,得到的比失去的來得多。去年十月,上司離職, Maggie轉到如今公司工作,慶幸遇到伯樂。本來於元朗店任店長,因為將店務打理得頭頭是道,得老闆賞識,不出數月就升職為總經理,除繼續管理元朗店外,又為現時的荃灣分店作「開荒牛」,選址、裝修、菜單設計、員工管理、宣傳等工作令她成長不少。受到以往大集團公司影響,原本只重視利潤的 Maggie,被老闆的熱誠感染:「初初我唔明佢點解連伴碟嘅番茄都買咁貴,但原來得呢隻連枝茄先做到爆汁效果,甚至有客人為咗粒番茄而嚟。」知道食物素質的重要,如今抱持「客人能以合理價錢品嘗到高質素西餐」的理念工作,對廚房尤其着緊。她自嘲不擅長廚藝,故抱虛心態度,「我唔會直接話好淡好鹹,而會問吓師傅如果我覺得淡應該點?始終我冇佢哋咁專業,要尊重佢哋意見。」尋得伯樂,獲益比想像中多。
水吧內的嘻罵聲混集鞋跟聲,見 Maggie與員工的熟稔程度,壓根兒不像一個管理層。平日除了管理工作, Maggie還兼任社工,分擔同事的私人事,「之前有兩個同事分手,日日都有個唔願返工,咪日日輔導囉!我哋年紀差唔多,佢哋都唔驚我,咩都同我講。」對於自己的早熟,她樂在其中,自覺是福。公私難分的工作,令 Maggie分身不暇。失去了她年紀該過的校園生活,就連私人時間都所剩無幾,她卻未有埋怨,「可能繼續讀書反而冇咁有滿足感,點知係好定壞?有得必有失,睇開啲啦。」猶如塞翁,得馬失馬,禍福當下焉能知。
老闆不時親自下廚, Maggie看準時機就上前偷師。
Chef's Stage Kitchen
地址:荃灣青山公路 398號愉景新城 1056D&1058號鋪
電話: 2799 9810
地址:元朗西菁街 23號富達廣場地下 52-55號鋪
電話: 2799 9880