范徐麗泰噚日開簡報會，大談自己出任主席11年嚟嘅感受，同埋未來兩個月嘅後立法會生活會點樣過。同范太份屬聖士提反女校校友嘅葉劉，一直都想范太離任出山，幫佢手拉票，但范太噚日就話，自己都有諗過呢樣嘢，但係立法會秘書處嘅同事好好人，同佢講立法會休會期間，根據《基本法》，特首可以要求立法會主席召開緊急會議，而佢由於唔能夠排除呢個開會嘅可能性，所以佢要守規則，保持中立，嚟緊嘅立法會選舉都唔會支持任何人。范太咁講，即係各有意乘機抽水嘅參選人，可以慳番啖氣。

唔鍾意做「尊貴議員」

范太唔幫葉劉拉票，但就讚長毛近半年已經好少大聲講嘢，近排開會時講嘢已經好細聲，「其實梁國雄對議事規則已經了解咗好多，其實佢已經融入咗議會。」范太又話，其實每個議員都有個人習慣，希望大家唔好成日話長毛，因為佢都好盡力做好議員工作喎。一向反建制嘅長毛議員，范太咁講唔知係讚佢定暗批「變咗質」呢？
范太其實唔幫人拉票，仲有大把嘢可以做。范太話聽日主持最後一場特首答問大會後，後日就會去番禺，因為佢有個親戚喺嗰度買咗個單位，去嗰度順便度假一星期，跟住8月就會去北京睇奧運，等到8月尾開埋人大常委會，先至會返香港為立法會選舉投票，跟住會再去美國坐船遊河，「我會一路放假，等自己唔好唔捨得呢個立法會。」
講起唔捨得，范太話日日都見慣班議員，嚟緊可能成個月唔到一次，最多只能喺電視見番佢哋，當然會有啲唔捨得，但佢對自己今屆完成任務，已經覺得「好好彩」，相信同咁多位議員冇仇口，將來「再見亦是朋友」。范太又話，做立法會主席11年，相信呢個係佢從政嘅高峯，「自此之後都高唔到去邊。」八方覺得范太唔使咁謙虛，其實人大常委地位一啲都唔低。
范太又話，雖然做咗咁多年議員，但對於出去主持典禮時，被稱為「尊貴議員」仍然好唔自然，因為覺得唔能夠反映議員真實職能，因為議員係為市民服務，「何尊之有？更無貴可言」，話反而叫議員做「盡責嘅公僕」會令佢覺得開心啲。
立法會星期日開完本屆任期最後一次全體例會，不過聽日嘅特首答問大會，先至係佢收山之作。

mailto:[email protected]