張達明同甘國亮今日到港台擔任「香港書獎」頒獎嘉賓，達明笑指大會應該邀請錯人，因為佢屬於舞台劇界別。提到小說文學，達明表示少時瘋狂追看金庸及倪匡作品，隨後接觸中國經典文學《西遊記》及《水滸傳》等，佢話：「之後因為受電影影響有睇香港作者如張愛玲同李碧華作品，我覺得電影同文學可以互相影響，舞台劇都做緊呢樣嘢，我已經將一部舞台劇劇本拍成電影，之後計劃將自己另外兩部舞台劇拍成電影。」

至於甘國亮就透露喺活動上同廣播處長梁家榮閒談，對方指現時港台冇太大預算邀請佢主持節目，甘生話：「香港人強項係善用資源，其實我以前幫港台拍節目都好少預算。」近日甘生喺專欄寫娛圈50年歷史，唔少事都係鮮為人知，佢指自己最強係人脈關係，仲記得去年喺紅館遇見方逸華，對方話：「你係70年代第一期訓練班，應該返母校做多啲嘢。」可惜唔夠3個月，方小姐便離世，問到會唔會同大台傾合作？甘生話：「如果有人邀請，我都會遵從方小姐嘅意思。」

精選娛聞，喺晒《娛果》
http://fb.com/appledailyent