o靚模出性感寫真入侵書展，掀起電車男同讀書人一場挺、反o靚模風波，連教區都要戒備呢啲衣着性感少女衝擊，因為大熱天時，去到邊都可以見到着住背心短裙膠拖鞋嘅妹妹，禮拜日去聖堂都作如此打扮，認真百無禁忌。
據了解，天主教香港教區主教湯漢上任後，有見越來越多美眉袒胸露臂橫行聖堂，又有球場小子波衫短褲望彌撒，可能有神職人員望之有不良好感覺，湯主教同一班神父商量後決定制訂「進堂衣着注意事項」，近日陸續貼喺各聖堂入口。

「希望教友自己反省」

入廟拜神八方就聽得多，入聖堂要着多啲衫，都係第一次聽聞，注意事項以圖示說明衣着宜忌；短裙熱褲袒胸露背唔好，闊領露臍亦不宜，呢種神聖嘅dresscode，唔單止望彌撒嘅教友要遵守，進場參觀嘅人亦要跟隨。
根據教區發出嘅圖示，男士入聖堂服飾要莊重，最好着長褲；女性可以着裙，但長度以及膝為宜，大家唔使怕無所適從，擔心日後入聖堂唔知點打扮先合適，以八方理解，總之一眾o靚模就係反面教材，只要唔好學似佢吔咁打扮就應該達標，告示亦有句《聖經》：「我的殿宇將稱為萬民的祈禱之所。」講到明去聖堂係祈禱，不要騷身材。
教區秘書長李亮神父話，雖然發出新守則，但就算教友衣着不恰當，神父都唔會趕人走，亦不會當眾訓話，「除非好極端，離晒譜亂晒龍，我哋先會出聲，好似你參加一個宴會，都會着得企企理理，以示尊重啦，係咪！我哋今次用圖畫解釋，都係唔想太規條式，希望教友自己反省。」
八方去過教堂參加婚禮，見過好多新娘套婚紗都勁性感，幾乎個個都露肩低胸，教區新頒佈dresscode，係咪適用於婚禮？李神父承認有神職人員提出過性感婚紗呢個問題，結論係認為婚紗要與時並進，設計上比較現代化好難避免，神父唔會太過干涉，講到尾最緊要大家自律。
mailto:[email protected]