何佩瑜（Jeana）今年禍不單行，今年3月由台灣拍攝完電影《天使曾經來過》，佢坐劇組安排嘅七人車從墾丁去高雄乘機返港，點知途中遇車禍，七人車轉彎時疑煞車掣失靈，車頭撞欄杆，坐司機位旁嘅Jeana撞到頭、眼、鼻，劇組立即安排佢哋送院檢查，Jeana事後覺得死過翻生。

Jeana噚晚喺社交網貼出瞓醫院吊針相，佢留言：「想不到這麼簡單一跌，竟然要這樣子。」今朝再貼出一張女子背影圖，Jeana再留言：「一臉擔心的媽媽，辛苦了。」《蘋果》今日打畀Jeana，佢氣若游絲話：「我兩周前喺屋企沖涼跣親，唔覺意跌親pat pat，佢又痛又腫，我以為捽吓冇事，點知佢越嚟越腫，又越嚟越痛，我呢幾日仲發高燒，成40度唔退，噚日去咗睇醫生，醫生要我立即入院，打抗生素針，因為我pat pat個傷口發炎，腫到成個芒果咁，今朝要做手術放膿，手術完咗，醫生話要留院幾日先可以出院，好彩冇傷到筋骨，呢次真係家居意外，大家真係要小心注意。」Jeana話傷口少少痛，佢都唔到跌一跌搞到咁大件事。佢仲話：「朋友笑我變咗芒果樹，咁唔使布置聖誕樹，索性掛啲燈泡喺身。」

Jeana媽咪就通宵留院陪愛女，Jeana話：「媽咪噚晚要我早瞓，收起咗我部手機。」男友翁子光仍然係內地趕拍電影《風再起時》，所以未能照顧女友。

更多娛聞，喺晒《娛果》
http://fb.com/appledailyent