【驚咗八爺】打到周身瘀嚇親老婆蔡少芬 張晉︰我叫佢走!
袁和平葉問外傳︰張天志張晉蔡少芬
張晉由武打出身,今時今日練得一身好武功,喺佢主演嘅電影《葉問外傳︰張天志》中,有唔少拳腳及高空同對手連場打鬥、拳拳到肉嘅驚險場面,全部由導演袁和平(八爺),為佢度身訂做,兩師徒合作,八爺對徒弟要求特別高,令張晉爆發力提升。
首次擔正做男主角嘅張晉,最初只怕不達標,八爺對佢評分有90以上,仲話:「抽得打得就係規矩,但啲戲都要得,同動作配合先好睇。」還專登加插唔同腿法畀張晉發揮,令畫面更豐富。
一幕喺搭建招牌街上嘅打鬥戲份技驚四座,張晉拍時都戰戰兢兢,佢話:「好高反而唔驚,會落佈景,呢場4、5層樓,唔係好高就全部用實景,但唔驚就冇咗危機感,難道在於配合,要喺招牌上追逐同機器配合特別難,加埋我有畏高,對我嚟講更難。」要最快克服畏高,張晉話:「一action就要嚟,手足話試下先,我話唔好試,一試就唔係嗰個動作,第一下就要去,咁會壯膽啲。」
同外籍演員戴夫巴蒂斯塔對打嗰種壓迫力係精采場面之一,張晉回想拍攝時場場都好辛苦,難忘一幕被打到全身打橫飛向雲石吧枱,因為冇軟墊硬撞落枱,戲中亦有唔少挨打場面。八爺話唔會特別對任何演員錫身,因為有冇力度、真假一睇就知。
另一對手楊紫瓊,之前張晉喺電影《臥虎藏龍》中做替身認識,今次變咗對手,張晉覺得係緣分好神奇,多年後兩人再相遇,仲話:「依然功夫好好,不減當年,對一個女人嚟講好難,今次對打親身體會到佢當年嗰種勁、快、速度,佢唔係練武出生,呢方面學得好快。」八爺亦稱讚楊紫瓊領悟能力高,學習動作快上手。
做動作演員周身傷習以為常,張晉太太蔡少芬曾經往探班,但見到拍激烈動作場面就唔敢睇,所以張晉唔主張拍打鬥戲時屋企人在場,佢話:「嚇親佢,本來佢同八爺好好,之後佢驚咗八爺,動作一定要去到盡先入到戲,有個鏡頭拍我被打,擋到手瘀,佢嚇到呆咗,我叫佢都係走啦。」
化妝:Zoey Chin (張晉)
髮型:Mai Kwan (張晉)
場地提供:Studio King 影樓王
精選娛聞,喺晒《娛果》
http://fb.com/appledailyent
本身係資深武術指導嘅袁和平,為新戲設計咗唔少武打場面。(劇照)