【新增內容及相片】
韓國年度影壇盛事第37屆青龍電影獎頒獎禮今日喺首爾慶熙大學舉行，早前大會公開嘅入圍名單中，有21部作品入圍爭18個獎項，當中由郭度沅、黃政民主演嘅《哭聲》總共獲11個獎項嘅提名，而人氣韓片《屍殺列車》，喺9個電影獎項組別中都有10個提名，認真犀利。

雖然首爾天氣嚴寒，僅得幾度，但一眾女星現身紅地毯時亦無懼寒冷，紛紛以盛裝打扮現身，不過平日不吝惜作性感打扮嘅金惠秀，今日以司儀身份同劉俊相現身紅地毯時，就只以黑色套裝示人，收起性感。

而有份入圍最佳男配角嘅《屍殺列車》「自私乘客」金義聖、競逐男新人嘅《來見我》李尚允、競逐最佳女配角嘅《黑祭司們》朴素丹、競逐影帝嘅《阿修羅》鄭雨盛到場，鄭雨盛嚟到現場仲好風騷勁派心心。上屆影后李貞賢《誠實國度的愛麗絲》、金泰璃、千玗嬉等都有撐場。主演《隧道》嘅裴斗娜同河正宇孖住出場，裴斗娜亦以一身性感透視裝現身。而競逐影帝影后嘅李秉憲同孫藝珍亦都壓軸登場，孫藝珍之前出席活動時嘅打扮不時失手，不過今日女神就悉心打扮，以一襲粉色低胸裙現身，微騷事業線，仲喺現場大派飛吻，冧暈粉絲。

另外，朴素丹同《奶酪陷阱》女星金高恩個樣成日被人話似，估唔到今日連韓國媒體都擺烏龍，標題寫錯金高恩現身青龍獎，認真搞笑。