聽障男生襲警罪成 媽媽接受專訪嘆：個官根本冇仔細聽過我嗰仔講嘢
蘋果日報 2020/12/01 16:36
聽障襲警
羅媽媽受訪謂：「我從來唔相信我嗰仔會襲警。」
聽障男生羅鎮傑襲警案裁決當日，旁聽席幾乎滿座，羅媽媽坐在最前排，腰板坐得筆直，面前是戴着耳機的兒子。她靜靜地聽着裁決，每聽一句，眉頭就鎖得更緊。她曾經相信，香港執法者公平公正；直至見證兒子從被捕到受審，屢受不公對待，才發現事與願違。她曾經相信，兒子即使有缺陷，也可過着快樂安穩的生活；直至見證兒子步進犯人欄，才發現法庭對聽障人士的嚴苛，「成個審訊都冇人當過我個仔係聽障人士」。
記者 黃健朗
羅媽媽腰板總是筆挺，眼神有時鋭利得像把刀，說話很少轉彎抹角。每次談起兒子，她語氣中總有種剛強的溫柔。
為家暴離婚 七年後始與兒子團聚
羅鎮傑來自一個新移民的單親家庭，5歲時父母離異，他要與媽媽分開，跟着爸爸和爺爺生活。羅媽媽說，離婚是因為有一個躁狂的丈夫，「突然聽到一樣嘢唔順耳，就會媽叉你……『做狗啦』、『你揸兜乞食啦』」。
離婚之後，雖然擺脫了家暴，卻被迫與兒子分開，獨自面對異地都市的殘酷，「嗰陣我啱啱落嚟冇幾耐，冇工作，冇生活，人生路不熟，連最親嘅人……都陪唔到你」。對兒子的思念、在異地的孤獨，最終讓羅媽媽患上抑鬱症，「我到依家仍然覺得欠咗個仔好多」。
直至羅鎮傑12歲那年，羅爸爸過世，母子終可團聚，她的心病亦好轉不少。鎮傑很孝順，年紀輕輕已懂得為媽媽下廚。鎮傑的拿手菜是蛋，不論煎蛋、蒸水蛋都有一手。鎮傑性格開朗活潑，喜歡踢足球，兩母子閒時會打羽毛球、踩單車，簡簡單單過周末。
某日突失去聽覺 現時近乎全聾
「2015年，有一日佢突然打電話嚟話：媽咪我個耳仔聽唔到嘢。」兩母子在醫院間奔波，一星期看3、4天醫生，羅媽媽最終決定辭掉工作，每天在家照顧兒子，「做咗好多檢查都唔知咩事，醫生都解釋唔到，之後照到佢腦入面有一個水洞，但都唔知係咪同失聰有關」。
醫生建議做開腦手術，抽取樣本化驗，「我覺得太危險，唔想個仔做」。檢查顯示，羅右耳聽力120分貝，左耳90分貝，即近乎全聾，需要助聽器協助日常溝通。
鎮傑與世界的連繫像肥皂泡般，沒有先兆地破裂。兩母子的生活從此天翻地覆。「自從失聰之後，佢就成日留喺屋企，冇朋友，唔敢去街，因為同人溝通唔到，人哋講嘢又聽唔到」。
與兒子溝通困難重重 「盡量講慢啲、大聲啲，唔可以急」
羅媽媽解釋，兒子自小有過度活躍症，亦有語言障礙，再加上聽障，與他溝通變得困難重重，「有時我哋會用書寫溝通，但都有困難，因為我接受嘅係簡體字教育，我唔識寫繁體」。
羅媽媽説，有時大家不能溝通，兒子也會發脾氣，她惟有用耐性克服，「盡量講慢啲、大聲啲，唔可以急，聽唔到就貼近佢耳邊講」。
儘管兒子有缺陷，羅媽媽仍為他的率真善良感到驕傲。她最記得，2016年與兒子到東莞旅行，其間不慎被偷了銀包；她下意識追了兩步，隨即醒覺不可丟下兒子不顧，只能任由扒手逃走。
「媽咪，等我大個仔，我做警察捉晒啲壞人」
羅媽媽憶述當時，「我好唔開心、好嬲，嗰仔同我講：『媽咪，你唔使嬲，等我大個仔，我做警察捉晒嗰啲壞人。』」話說至此，羅媽媽堅定地補充：「所以我從來唔相信我嗰仔會襲警。」
去年9月15日晚上，羅鎮傑在銅鑼灣港鐵站C出口外被捕。當晚羅媽媽接到電話，警員通知她指兒子被捕，要她馬上到北角警署，「入到去（接見室），見到佢臉、頸、膊頭都有損傷，對眼又紅晒……佢好驚，唔敢講嘢」。
警員要求羅鎮傑抄寫文件，又向羅媽媽聲稱不是正式錄口供，並謂「男子漢大丈夫，做錯要認……」、「我細個都好曳㗎……」、「可以判社會服務令、感化令……」
「所以讀得書少係慘嘅……我以前以為警察唔會呃人㗎」
羅媽媽從未聽過這些艱澀的法律術語，以為警員只是簡單筆錄，稍後可以再補充，「所以讀得書少係慘嘅……我唔知原來香港錄口供可以唔講嘢……我以前以為警察唔會呃人㗎，到今時今日先知，原來唔係。」
羅鎮傑最終被控襲警罪，被指企圖搶奪警司區永樑的胡椒噴霧。鎮傑不認罪，上庭受審。辯方反對將羅的招認口供及補錄口供呈堂，投訴錄口供時有警員威迫利誘。審訊第二日，鎮傑出庭自辯，控方向他指出警員根本「冇」說過「男人大丈夫做錯事要認」，鎮傑不慎將「冇」聽成了「有」，答了同意。
雖然鎮傑在覆問時有作澄清，惟裁判官鄭紀航不信他聽錯，裁決時斥他作供前後矛盾、謊話連篇，裁定鎮傑襲警罪成，還柙候判。
「我正常人都唔係完全聽得清楚，何況一個失聰嘅人？」
回想審訊過程，羅媽媽憤然道：「成個審訊，冇人當過我個仔係聽障人士。」羅媽媽解釋，兒子除了聆聽，也需要依靠讀口型去理解對話，當法庭上所有人均戴上口罩，羅只能依靠耳機，「我正常人坐喺下面聽，我都唔係完全聽得清楚，更何況係一個失聰嘅人？」
羅媽媽指出，其實法庭可尋求專家意見，評估鎮傑的聽力狀況，但四日審訊期間，法庭從未查問過鎮傑的聽力水平。
「我想知道，阿Sir就係全部講晒真話咩？我覺得唔係囉，至少佢呃我哋簽名嗰陣唔係囉。」羅媽媽說，面對審訊期間的種種荒謬，她敢怒不敢言，「我唔可以出聲，畢竟嗰度係法庭。」看着兒子因答錯問題而被定罪，她更加心酸。
「就係唯一嗰日嗰條問錯咗，就否決晒所有嘢」
羅媽媽心有不甘：「佢（裁判官）根本冇仔細聽過我嗰仔講嘢。我記得主控問佢好多，佢都答唔同意，就係唯一嗰日嗰條問錯咗，就否決晒所有嘢。就好似一個考生考試，十題入面錯一題，零分不單止，仲以後冇得再入試場，剝奪佢成世人嘅權利。」
作為母親，她不期望兒子出人頭地，只求他生活安穩，找份安定的工作。然而，這場審訊粉碎了這個簡單的願望。
現在，鎮傑被扣押在西貢壁屋懲教所，羅媽媽幾乎每天都會去探望兒子，車程來回4小時，就只為見兒子15分鐘。「佢多數都會叫我唔好咁辛苦，唔使日日探佢……其實我好擔心佢俾人蝦。我叫佢遇到咩事都要冷靜，千祈千祈唔好同人有磨擦。」
休庭期間與兒子形影不離 最終只能目送兒子步進犯人欄
鎮傑曾表示對審訊結果很不忿，羅媽媽無奈道：「你唯一嘅錯，就係唔應該喺嗰日、嗰個時間、嗰個地方出現。」
記得審訊四日期間，羅媽媽在旁聽席總是坐得筆挺，眼神毫不動搖，彷彿不想遺漏法庭上的一字一句。休庭時，她總與兒子形影不離，時常在耳邊叮囑他：「你一定要冷靜，聽唔清楚一定要問。」
兒子被帶進犯人欄那刻，她沒有哭，也沒有說話，只給了兒子一個眼神，目送着兒子走進那道木門。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！