入行三十年《PTU》成傳家之寶
任達華爭影帝信心爆棚

蘋果日報 2004/02/22 00:00


任達華最近憑電影《PTU》獲提名《第二十三屆香港電影金像獎》候選影帝,他直言在候選者中自己做得最好。入行三十年,他始終喜歡演警察,因為這類人物的心理層面比較複雜,演繹起來甚有挑戰性。任達華還笑言會珍藏《PTU》DVD,並將之視為家傳之寶。
事業篇:繼續警察故事
任達華主演的電影《PTU》獲提名《第二十三屆香港電影金像獎》的「最佳男主角」,雖然他早前於金馬獎鎩羽而歸,但無損他問鼎影帝的信心。屈指一算,任達華在演藝界眨眼已三十年,曾接拍過的警察電影超過三十部,不過最具代表性的,外間均認為是《PTU》,他於言談間亦透露了奪取殊榮的渴望。

減產損失百萬
任達華坦言恨攞獎,他日前賣花讚花香說:「我都有睇過其他對手嘅戲,但要我揀睇好邊個,我仍然會揀自己,雖然大家都好用心做好自己嘅角色,但我始終覺得自己做得最好,我好有信心。」
據知任達華當日決定接拍杜琪峯的《PTU》後,在兩年的籌備過程中,他只接拍了與荷李活女星安琪蓮娜祖莉(AngelinaJolie)合作的西片《盜墓者羅拉:生命之匙》,他說:「我嘅收入大減,最少損失咗七位數字,但𠵱家睇嚟真係好值得,因為當時我嘅狀態係最fit嘅。」
任達華在《PTU》中飾演警官何文展,對白雖不多,但有很多內心戲,他說:「曾經有警察同我講,話覺得我好表達到佢哋,因為呢個角色亦正亦邪,性格好深藏內斂,係另一種層面。」
翻睇百看不厭
任達華先後看過這齣戲五次,但仍百看不厭,他說:「我深信未來五十年,甚至一百年再翻睇呢套戲都唔會out。將來人哋要開拍警察題材嘅戲,仍然可以用佢做參考藍本,所以我已打算將《PTU》嘅DVD做傳家之寶,留畀子孫。」
任達華的演技早獲認同,惜運氣平平,一直與獎無緣,未知這是否與他早年接片太濫有關呢?他否認說:「我唔認同以前拍嘅係爛片,雖然唔可以靠嗰啲戲喺影壇攞大獎,但佢為我帶嚟可觀嘅片酬同提升我喺內地同歐美嘅知名度。全靠當年積累嘅片酬,我今日先可以有能力去揀喜歡嘅戲拍。」

望執導警匪片
問任達華未來渴望演甚麼角色?他說:「我鍾意扮警察,因呢個行業接觸層面廣,唔同崗位可以有唔同嘅故事。」
隨着閱歷和演戲經驗增加,任達華亦有興趣執導電影,他說:「如果要拍,我都係繼續以警察故事做題材,但係呢個夢想相信都要遲啲先可以實現。」
empty
小時候捱過的任達華,深明知足常樂的道理。
empty
早前任達華(右)與安琪蓮娜祖莉(左)合作,得益良多。
劇照
empty
任達華在《PTU》的表現獲得外界讚賞。
劇照