頭先大家見到嗰張、金光閃閃娘到爆裂嘅「金蛇凳」，真係令羅拔唐尼……同外國嘅fans，呆咗。以前只會聽人講坐龍椅，龍係九五之尊；咁蛇呢？龍在天蛇在地，想點？原因係因為羅拔唐尼生脊屬蛇。今年肖蛇犯太歲喎，咁使唔使整番個化太歲錦囊俾佢？

化太歲錦囊就冇喇，更多騎呢嘢等佢。坐完金蛇凳，大會送咗幅《鋼鐵俠》(內地係咁譯)書畫俾羅拔唐尼，仲俾咗個超巨型印章俾佢，齊齊喺上面打個chok簽收……個印章肉酸到、師奶劇都唔會攞嚟做道具，直頭娘爆。

更搞笑仲係，佢哋身後嘅「小金人」。其實呢個小金人，係似作和尚打扮嘅工作人員，佢化到成塊面金色，真係唔知大會究竟想點。……如果羅拔唐尼唔係睇錢份上、幫Marvel吸水，你以為佢會陪你癲？