C AllStar同林欣彤今日參與鑽石山舉行《第八屆戒煙大贏家無煙社區計劃》啟動儀式，C AllStar三缺一現身，講到成員King去咗邊，原來係忙於為佢有份參與電影《那一年，我17》做宣傳，噚晚全公司撐King首映場，釗峰笑指每逢有King畫面，全場都一齊爆笑，On仔話：「我噚晚坐King隔離睇，佢問我係咪去得太盡，我話做演員要放底歌手包袱，睇吓鄭中基就知。」釗峰指King有望做鄭中基接班人，點知Jase話King有排都未夠班，其實三人都有興趣演戲，Jase更指喺一次訪問中被林雪指適合演毒犯，但只係被打毒針毒犯，而On仔外型則適合演卧底。