【挑戰Chef Nic】預告放假學廚藝 Eason轉行做煮飯佬?
陳奕迅盧凱彤放假下廚
陳奕迅(Eason)今日喺台灣為其音樂紀錄片《L.O.V.E. in F.R.A.M.E.S.》舉行首映會,片中收錄佢8年前舉行「DUO巡迴演唱會」時嘅台前幕後花絮,亦有今年8月墮樓身亡的盧凱彤(Ellen)嘅身影。
喺活動上,播放咗由Ellen有份參與曲詞嘅《海裡睡人》MV,只見平日跳跳紮嘅Eason睇睇吓低頭沉思,未知係咪諗起Ellen生前點滴,顯得不捨。Eason話下月12日結束宣傳之旅之後,就會休息幾個月,仲話自己乜都唔會諗,喺屋企用wifi上吓網,同有只聽歌就OK。
Eason又提到自己會趁機學下廚,得閒就煮飯俾自己食,佢又話好鍾意睇戲,試過喺飛機上睇戲,正感動到喊晒嗰陣,空姐走嚟問佢要唔要食嘢,佢笑言被打斷情緒,唔知好嬲定好笑。被問到其14歲女兒陳康堤遭撞破同男仔拖手拍拖,Eason就顯得不願多講、只想畀個女有交友空間,並希望傳媒唔好打擾個女。
至於新巡迴演唱會,Eason話仍在籌備,希望將啲節目細節準備好先預定表現場地,最快可能要到後年。講到佢之前推出新歌《可一可再》被指涉抄韓國歌手尹鐘信嘅《一月到六月》(新聞連結: https://bit.ly/2S3nSCx ),Eason再次澄清:「我真的沒聽過那首歌,怎麼抄襲呢?這個話題太無聊了。」再問佢會唔會因為咁樣而唔敢再寫歌?Eason攞番02年做校園騷時不慎撞傷下體嗰次意外自嘲話:「我連某個器官都在台上破壞掉了,難道這樣就不敢上台?」佢仲話自己嘅座右銘係「不會那麼容易就放棄」,以後仍會繼續寫歌。
精選娛聞,喺晒《娛果》
http://fb.com/appledailyent
Eason今日心情興奮,在台上不停擺甫士。(台灣《蘋果日報》)
紀錄片有佢做巡迴騷時,台前幕後嘅點滴。(台灣《蘋果日報》)
Eason話嚟緊會放幾個月假。(台灣《蘋果日報》)