經民聯近年都愛擺盆菜宴，同支持者、街坊同義工擦餐勁，席間會向義工發嘉許狀。今日傍晚佢哋亦喺土瓜灣遊樂場舉辦新春盆菜宴，筵開二百幾席。九西呢期好爭議，但相信經民聯喺呢個事非地開餐，絕對唔關故宮事，或因黨內唯一直選立法會議員梁美芬係九西女將，遷就下呢位直選議員！

除咗領導層如監事會主席林建岳等到場主禮，政制及內地事務局局長譚志源同食物及衞生局局長高永文亦畀面撐場；期間民望高滿場飛，同市民自拍留影；而喺開席時，佢更雙眼發光，流晒口水咁款，原來佢對筷子挾住咗一嚿肥豬肉，好似等唔切要落肚咁滯，估唔到民望高都咁為食㗎喎。