社民連除咗以街頭抗爭著名，另一特色就係窮。參選立法會選舉開支一闊三大，出戰新西嘅阿牛曾健成噚日向八方呻窮，話佢舊年選區議會選舉時應該獲得嘅每票12蚊資助，到家都未收到，想幫補吓都唔得。
阿牛話，一般選舉完兩個月內就會「回水」，佢遲遲收唔到錢，向選舉事務處追數；但處方回覆，因為佢話對手李進秋少報競選經費，提出選舉呈請，至今未有結果，根據《區議會條例》，係唔批得錢住喎。八方計番，阿牛喺區選得票1,871，即係可以收番2.2萬左右；雖然錢唔係多，但阿牛話選舉呈請家連期都未排到，唔知仲要等幾耐，希望處方酌情處理。