政改表決，今日全城焦點盡在中環，按照劇本，政府可爭取高票通過政改方案，美中不足係不能「通殺」民主黨九票，鄭家富已表明反對，涂謹申則未諗得通。
網民早前開出泛民轉軚賠率，家陣民主黨支持政改方案，如果有落注，等派彩咯；買涂謹申嘅就要等多陣先知結果，買鄭家富轉軚者就搣飛嘞。不過有賭未為輸，八方聽聞噚日隨即有人開新盤口，就係鄭家富會否退黨。

鄭家富退黨賠率1.4倍

據講有人開出鄭家富退黨賠率1.4倍，熱過英格蘭世盃小組首名出線。有熟識鄭家富嘅前少壯派人士得悉呢個盤口不以為然，事關鄭家富數年前有機會退黨，最後一刻卻縮番條槓，因此呢位人士認為鄭家富今次都唔會同民主黨分手，被紀律處分踢出黨係另一回事。
至於涂謹申意向暫未有盤口，不論敵友都認為佢跟大隊投票機會甚高，退黨成數亦不大，反而唔少人買佢今日喺立法會發言時，情緒激動到流眼淚可能性甚高，皆因阿涂係性情中人，要喺政改交叉點作出人生抉擇，感慨萬千，流下男兒淚在所難免。

眼淺議員淚眼迎政改

阿涂噚日同八方講，喺佢苦苦思考政改投票意向同去留時，好多人SMS、電郵或留言鼓勵同畀意見佢，令佢感到好溫暖，因此八方有理由相信，阿涂今日發言時好難控制情緒。但講到淚眼迎政改嘅「膽」，非公民黨湯家驊莫屬，佢由A45到組黨，在公在私喊過無數次，今次同黨友因為公投鬧分歧，到最終修成正果，千山獨行忍辱負重，到了最後關頭，冇理由唔放肆發洩一下。
另一個發言時會喊嘅「膽」係余若薇，原因唔使八方多講，只要記得余曾辯最後總結時，余大狀哽咽一幕，可以預計佢今日都唔會吝嗇淚水，辜負擁躉對佢嘅期望。以上幾個係「膽」，「腳」則首選陳淑莊，公民黨物以類聚，加上陳淑莊又係大情大性嘅人，公投造勢晚會上，佢幾乎一出場就喊咗出嚟。
實際有幾多人喊，未到咇出眼淚一刻都係未知之數，不過今日水淹中環冇走雞，因為每個議員最多可以發言30分鐘，人人奉旨噴口水，有乜理由唔水浸。
mailto:[email protected]