香港人鍾情日本貨，不用多談。當然，識得買你先係專家，正如日本土產水果人人趨之若鶩，其實不同產地的水果亦有分等級。換句話說，識揀日牛穿搭，未算潮人，專挑來自日本岡山生產的牛仔褲，才是真正識貨。更難得的是，岡山牛仔達人Hiro Yoshikawa用上十年時間研發由手工和紙製成的牛仔布，吸引時裝界注目並推出CHEVIGNON x WASHI高級和紙牛仔系列。且慢！用紙做的牛仔褲？睇埋落去先啦，質地仲堅挺軟薄過一般全棉牛，型到噴汁呀。

岡山，作為被世界牛仔時尚界公認為最高牛仔工藝之城，連美國某牛仔品牌在二戰後也在該地設廠，已是有迹可尋。一般來講，傳統的優質牛仔布，都是以全棉製成，不過時代步伐唔等人，當汽車都由柴油驅動變成氣體驅動，牛仔其實也可以由一張手工和紙開始演變而成。

沒錯，一張手工和紙，究竟可以變出怎樣的可能性？答案是先由和紙轉化為紗線，再與日本棉製紗作為經緯編織成牛仔布，最後成為一條可供人穿搭的牛仔褲，其耐用程度甚至長達十年，出來效果比一般全棉牛仔褲更型更潮。生產嘅過程係有點繁複，唔緊要，所謂「前人種樹後人乘涼」，製成品出產後的CHEVIGNON x WASHI高級和紙牛仔系列，試過上身真係跟平時着開嘅牛仔褲無大分別，反而整體褲身既堅挺又夠立體，重量又輕。Hiro Yoshikawa直言「這就是日本手工和紙的魔力，尤其當你着耐咗，和紙牛仔洗水過後，加強了紙質的獨有記憶特性，更能穿出個人風格的牛仔。」

手洗無難度 潮濕重地一樣掂
着開高品質嘅牛仔褲，大家都捨不得着一日半日就拎去洗，免得同時沖洗牛仔上打造出的歲月痕迹。和紙牛仔褲用「紙」做，仲要攞去洗？「有乜問題？日本和紙並非一般的紙張，我自小喺日本和紙製嘅傳統和風居所成長，屋內冬暖夏涼夠晒溫情，加上生產過程我堅拒使用化學劑，唔係我點解要用十年時間研發手工和紙植入牛仔布嘅可能性呢。不過，我建議盡量就唔好洗，因為和紙質地天然，若果有清洗必要都要手洗，先放喺地上用花灑淋濕牛仔褲，踩乾後掛上，太陽曬或晾乾都無有怕。遇着香港潮濕天氣嘅話，放部抽濕機就得，總之唔好機洗。」

Hiro Yoshikawa坦言今次首次跟香港品牌合作，推出CHEVIGNON x WASHI高級和紙牛仔系列更是落足心機（最平$2,790, 最貴$4,990），不過佢本人對布邊牛仔（Selvedge）特別情有獨鍾，因為布邊牛仔是由重洗水打造，風格較為剛強，所以製作過程都幾繁複，因此產量亦只能限量生產，賣一條少一條，但卻又啱佢呢類玩慣牛仔嘅潮人大叔。「其實呢，穿衣配搭係沒有年齡限制，尤其牛仔裝束更是任何體型人士都可穿出個人味道之單品，中佬又點？都有好多變化嘅，揀着貓鬚牛仔褲就盡量揀soft啲嘅設計款式，唔需要太張狂，亦唔好揀加工效果太強嘅牛仔褲，配合番個年紀，一樣可以襯得有型。」

文：克藍瑪
攝影：許先煜

Produced by: Fruity Nutty Studio

-------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
---------------
全港打工仔特約：Lun廚動腦Q
加開1:30pm   
3月11至22日
星期一至五1:30pm 10:30pm
http://bit.ly/2VKESPM