中環在線:《信報》賣盤羅生門

蘋果日報 2005/12/21 00:00


李澤楷睇嚟真係好有興趣做傳媒。記得佢上月嚟《蘋果》參觀,對各個部門都睇得好仔細,有乜唔明就問。噚日,有報道話佢會收購《信報》。《明報》記者向李澤楷求證,佢嘅答覆係「至今並沒有任何協議,連意向書也沒有」。咦,並無協議,咁即是有傾過啦!
華華由80年代初開始睇《信報》,由東籬程逸和張五常到艾黛到余錦賢,都好有感情。遇有大是大非,梗要搵林行止社論讀一讀。《信報》如果賣,香港好多人都唔捨得,亦擔心易手後佢嘅立場會唔會變。
為咗呢單新聞,有記者噚日在《信報》報社門外企咗成個下晝,但都問唔到乜嘢。華華自己去問,答案就係「外界經常有財團接觸《信報》,但從來未收過PCCW或者Now任何入股或收購要求。另外,林先生同林太太近兩三年冇見過李先生」。至於PCCW嘅答覆,就係「對《明報》嘅報道冇乜嘢可以補充」。
聽過官方回覆,華華嘅解讀就係:李澤楷真係想買,而且一定有傾過,只係目前未傾掂,可能係價錢或者其他條件唔啱。大家等多一陣,就會水落石出。
回歸之後,報業唔易做,不過一直有人想做。Now搞緊財經台,李澤楷買間財經報社好合邏輯,何況重有好多界外利益,問題係點樣說服到林生林太啫。
李華華
empty
林行止
empty
李澤楷嘅Now搞緊財經台,佢想買間財經報社亦唔出奇,但要說服林行止出售《信報》就唔係咁易。