十二月四日，有幾多人願意上街，大家靠估。左丁山在周末期間，在馬場、馬會、學校，碰到好多中產階級朋友，初步得到一個結論，就係好多人對民主派提出嘅上街口號，不甚了了，唔知十二月四號上街，究竟係為咗乜。
陳師奶講：「李柱銘話要爭取○七、○八年直選喎，如果係咁，明知爭唔到，人大話咗冇，重上街嚟做乜，慳番啖氣啦。」
馬主C講：「香港人好現實嘅，你叫我哋去爭取一啲已知輸梗嘅嘢，例如○七○八直選，點會制呀，odds完全唔啱。中央話咗唔畀㗎啦，做乜要與虎謀皮？」
地產H講：「直選係值得爭取嘅，假如話爭取2012年或者二○一六年直選，我會支持㗎，○七○八喎，明知不可為而為，想做烈士咩！」

聽咗好多人講，左丁山相信如果民主派清清楚楚，打出明確口號——爭取二○一二年雙普選，唔再講○七○八直選，遊行人士可能大幅度增加，再講○七○八年直選嘅話，上街嘅人士會比較少啲，過往好多次民意調查顯示，收入愈高，教育程度愈高嘅人，大多數支持爭取直選，支持民主派，反對直選之人，大部份係收入低，教育程度低之人（當然，其中亦包括極有錢極高教育程度嘅風派）；但現在董去曾來，曾特首本身係中產階級出身，對中產有一定吸引力，與董特首抗爭好容易贏，與曾特首抗爭，未必有勝算，民主派唔可以一本通書睇到老，策略上要靈活啲先至得。毛主席話：「革命的道路是迂迴曲折的」，即係唔會係一條直線，直達目標，過程中需轉吓彎，兜吓圈。如果有人轉彎兜圈，就鬧佢轉軚，可能有欠公道，亦不正確。老毛如果吓吓正面攻擊，與蔣介石正面大戰，老早人頭不保啦。佢去重慶高叫蔣委員長萬歲之時，你話佢轉彎還是轉軚吖！
左丁山相信，爭取2012直選係一個適合當前香港人嘅口號，民主派請考慮吓。