新車速報：
豐田EstimaX-Pro享受至高
車廂鋪排講究有瞄頭
新車嘅車廂鋪排十分講究，除咗三排真皮座椅配搭，以及碳纖維面板外，另外重新加有至新又Top嘅MD連CD音響，重有六聲道喇叭連低音炮，不過只限30部咋！此外，重有白底藍光表板，車身兩邊透光金屬門枕；當然唔少得重有原廠泊車裝置、電動趟門同雙天窗組合㗎！若然你重想加置一套AV系統的話，都不過畀多9千8百蚊呢！
有型包裝顯個性
想擁有炙手可熱嘅豐田Estima八人MPV，但又想突出個人品味的話，呢款至新嘅EstimaX-Pro或許會啱你口味。事關佢裝有至新鬼面罩、時款聚焦頭尾車燈之餘，重有趨時吸引嘅17吋跑車合金軨同雙層式尾定翼組合㗎！
3.0公升V6偈輸出強勁
呢部EstimaX-Pro新車，裝有一台3.0公升V6偈，匹配4前速自動波箱，既慳油又好力；而低重心車架結構能令行車倍見穩定外，四輪17吋合金軨加上高效能四輪碟煞，還有ABS連EBD裝置，均予人十足信心呢！