「禁堂食令」今日生效，令一眾打工仔為搵處地方食餐晏都叫苦連天，地盤工人更加是最痛苦的一群，大熱天時30幾度，仲有酷熱天氣警告，中途仲落埋大雨，食餐晏都大汗叠細汗，唔少人更要踎喺巴士站路邊，吸住廢氣捱飯盒，真係有苦自己知。

有工友邊食邊破口大罵政府玩殘工人，但亦有工人未有怨天怨地，更懂得在苦中作樂，拍片娛人娛己，用另一種方式勉勵工友「頂硬上」，記錄工友今日在「禁堂食令」下的辛酸。網上今日流傳一條短片，片中一名工友赤裸上身坐在路邊，在風雨中捱飯盒，身邊一名工友問佢：「呢位工友，咁X大雨喺度食飯，係愛定係責任呀？」捱飯盒工友即轉身答道：「係肺炎呀，X你老母！」旁人睇完可能覺得無聊幼稚，一笑置之，但相信一齊在路邊捱飯盒的工友都會找到共鳴，深深體會到當下地盤工人在「禁堂食令」下的苦況。

其實今日呢條短片係翻炒兩年前一條曾瘋傳的「年輕人，究竟有乜嘢動力驅使你喺一個暴雨下工作呀？係愛定係責任呀？」短片，片中有人問一名工友在暴雨下工作是為了「愛定係責任呀？」工友陰陰笑住大聲答：「係窮呀！X你個X！」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568