飲食人誌:奇異果熬魚湯×6種秘製醬汁
新派邊爐大混醬
做飲食最怕一成不變,豬骨煲幾好味都會Out!新開火鍋店有新噱頭,邊爐湯底加入奇異果熬魚湯,啖啖鮮甜味道清新,另有6種秘製醬汁畀你大混醬,是否叫好叫座暫時未知,單是這份力求創新的誠意,已吸引到貪新鮮的為食一族力撐!
記者:周頌堯 攝影:林栢鈞
模特兒:Katie、Isa
四季火鍋好,好在一年四季隨時有得食;四季火鍋弊,弊在變化少,一年四季來來去去都是甚麼麻辣、豬骨湯底。3年前喪興豬骨煲,家家火鍋店都話自己最正宗,3年後的今天,再獨沽一味豬骨煲幾好味都無人睬,「骨煲皇」負責人Martin深明此理:「四季火鍋好難做,尤其喺夏天,打邊爐嘅人一定少,所以點都要喺湯底方面搞啲噱頭。」噱頭,其實是推出加入水果的魚湯底:「我發覺一般火鍋店好少魚湯底,所以諗住用草鯇、加州鱸魚同大魚配奇異果熬湯,等客人有多啲選擇。」水果千百種,為何偏用奇異果?「菠蘿、芒果、火龍果我都試過,但只有奇異果先可以完全辟走魚腥又唔會破壞魚嘅鮮味。」
新店新裝修,地方潔淨絕非一般地踎火鍋店可比,全店得25張枱,枱與枱之間很闊落,Martin解釋:「打邊爐要大班人企起身烚吓烚吓先過癮,逼逼狹狹就唔好喇。」除卡座方枱外,還訂做的橢圓形枱,每張盛惠$9,000,兩頭闊中間扁,方便人坐中間鍋爐伸手可及,兩邊也可騰出更多空間擺放大小碟配餸。見微知著,提供的木筷子從老子號「萬記」特別訂做,有10吋長:「筷子長啲,夾嘢食都無咁易辣親手喇!」醬汁方面,店子提供3層高日式醬料架,上有茉莉花醬、腐乳醬、辣蟹醬、沙茶醬、南薑黑醋醬和奇異果青芥末醬6種醬料任擇,另加指天椒、芫荽、薑絲、葱茸、葱花與葱白,任客人自由組合大混醬,店員還會因應客人所選湯底與配餸,推介不同醬料作配合。
大蜆$30 螄蚶$30
大蜆要完全灼熟,螄蚶則放湯5秒即起,蘸奇異果青芥末醬,有點吃日本刺身Feel。
雜菌$25 脆玉瓜$15
茉莉花醬食其清香,配味淡的雜菌與脆玉瓜最夾,Martin:「菌瓜類千祈唔好點豉油,無茉莉花醬點,寧願齋食。」
鴕鳥肉$30 四寶丸$15
鴕鳥肉雖屬紅肉一種,但食味超淡,剁碎搓成的四寶丸少不免失去部份肉味,蘸南薑黑醋醬,酸酸甜甜令人更開胃。
肥牛小$80 中$100 大$120
竹筒牛滑$30
沙茶醬味道較濃最夾紅肉,Martin每日到街市睇辦揀貨,肥牛不上乘,寧願不賣。
黑豚肉特價$18肉眼筋$15
豬肉宜蘸腐乳醬,因豬肉比牛肉較韌身,肉味亦較寡,腐乳醬味道最濃烈,蘸一點吃,方能提升豬肉肉味。
白鱔片$30
澳洲肉蟹時價約$6両
辣蟹醬用蟹粉加少許蟹殼調成,本身是海鮮所以與白鱔片、肉蟹最夾。
A.奇異果草鯇魚湯$60
個半奇異果切粒加番茄、薯仔,草鯇取魚腩部份,先輕輕紅燒再放湯熬,免魚肉散開襟熬得多。
B.木瓜奇異果雪耳
鱸魚湯$60
木瓜只微甜,雪耳與蘑菇本身味淡,故配原條加州鱸魚,貪其多肉兼味道較濃,可提升湯底鮮味。
c.芫荽奇異果豆腐大魚頭湯$60
芫荽主要辟腥,豆腐本身無味,枝竹只能加強湯底香氣,故配大魚最有鮮味的魚頭部份。
噱頭搞盡,輪到實際嘢,即日起至7月15日,惠顧每枱可以優惠價點1碟香草蟹粉餃($8每碟8隻)或1碟黑豚肉(每碟$18,原價$60),抵食必點一於食盡佢!
骨煲皇美食坊(23804221)
營業時間:11:00am至4:00am
地址:旺角塘尾道27至41號百勝大廈3號地舖
座位:約100個
麥小姐:「不嬲都幫襯開『骨煲王』,奇異果湯底都幾騎呢,不過我都會試。」
劉先生:「第一次幫襯,啲嘢都幾新鮮,我推介奇異果大魚頭湯底。」