楊冪6月1號喺香港港安醫院剖腹產下囡囡，乳名「小糯米」，楊冪今日留院第三日，「小糯米」嘅爺爺嫲嫲、公公婆婆，喺下晝1點幾現身醫院，探望楊冪同孫女「小糯米」。

著粉紅色衫、精神奕奕嘅爺爺劉丹，笑到見牙唔見眼，問到丹爺有冇抱吓孫女，丹爺話：「有，好彩冇忘記抱BB個姿勢，佢哋話我抱得幾靚，北方人話初生BB會似姑姑，再大啲就唔知。」

楊冪為劉愷威生咗個乖乖女，老爺劉丹有冇親自準備補品畀新抱呢？劉丹話：「陪月一手一腳搞，醫生話佢好fit，今日起身仲特別好胃口，0依家餵人奶，唔使急住修身，後生女都會修得好快。」丹爺話滿月、百日宴由劉愷威安排，丹爺又話一抱著孫女，就忍唔住不停影相。